10 июль куни Марказий сайлов комиссияси матбуот марказида бўлиб ўтган матбуот анжуманида Ўзбекистон президенти сайловининг дастлабки натижалари эълон қилинди.
Ўзбекистонда муддатидан илгари президент сайлови 2023 йил 9 июль куни бўлиб ўтди. Мамлакат бўйлаб очилган 10 мингдан ортиқ сайлов участкалари соат 8:00 дан соат 20:00 га қадар сайловчиларни қабул қилди. Марказий сайлов комиссияси берган маълумотга кўра, сайловда жами рўйхатга олинган сайловчининг 15,6 миллион нафари, яъни сайловчиларнинг 79,8 фоизи овоз берди. Сайлов кодексининг 96-моддасига мувофиқ, агар сайловчилар рўйхатига киритилган фуқароларнинг 33 фоизи овоз беришда иштирок этган бўлса сайлов ўтган ҳисобланади.
Президент сайловининг дастлабки натижаларига кўра:
Абдушукур Ҳамзаев (Экологик партия) — 3,74 фоиз;
Улуғбек Иноятов (ХДП) — 4,02 фоиз;
Робахон Маҳмудова (“Адолат”) — 4,43 фоиз;
Шавкат Мирзиёев (ЎзЛиДеП) — 87,05 фоиз овоз тўплаган.
Сайловчиларнинг 87 фоиздан ортиқ овозини олгани учун Шавкат Мирзиёев 7 йил муддатга Ўзбекистон президенти этиб қайта сайланди.
Муддатидан илгари Ўзбекистон президенти сайлови
30 апрелда бўлиб ўтган референдум натижаларига кўра, Ўзбекистон Конституцияси янги таҳрирда қабул қилинди. Янгиланган Конституция давлат ҳокимияти олдига янги сиёсий, ижтимоий-иқтисодий вазифаларни қўйди. Шу боис давлат раҳбари Конституциянинг 128-моддасига мувофиқ, муддатидан илгари президент сайлови ўтказиш ҳақида халққа мурожаат қилди. Бу ташаббус Олий Мажлис палаталари, сиёсий партиялар ҳамда жамоатчилик фаоллари томонидан қўллаб-қувватланди.
6 май куни Сайлов кодексига киритилган ўзгартиришларга кўра президент муддатидан илгари Ўзбекистон президенти сайловини тайинлаган тақдирда, сайлов ушбу кодексга тўлиқ мувофиқ ҳолда 2 ой ичида ўтказилади. Бунда сайловга тайёргарлик кўриш ҳамда уни ўтказишга доир тадбирларни амалга ошириш муддатлари Марказий сайлов комиссияси томонидан белгиланади. Президентликка номзодларнинг сайловолди ташвиқоти 7 июндан бошланди. Ўзбекистон президенти сайловида иштирок этаётган ҳар бир номзодга тарғибот тадбирлари учун 4 миллиард 914 миллион сўм ажратилган.
Шавкат Мирзиёев ҳақида
Шавкат Мирзиёев 1957 йил 24 июлда Жиззах вилоятининг Зомин туманида шифокор оиласида туғилган. Миллати — ўзбек. Маълумоти — олий. 1981 йилда Тошкент ирригация ва қишлоқ хўжалигини механизациялаш муҳандислари институтини тамомлаган. Ихтисослиги — муҳандис-механик. Техника фанлари номзоди, доцент.
1981 йилда Тошкент ирригация ва қишлоқ хўжалигини механизациялаш муҳандислари институтида кичик илмий ходимликдан бошлаб, катта ўқитувчи, доцент, ўқув ишлари бўйича проректор лавозимларида ишлаган. 1990 йилда Республика Олий Совети депутати этиб сайланиб, Мандат комиссиясининг раиси сифатида фаолият юритган.
1992 йилда Тошкент шаҳрининг Мирзо Улуғбек тумани ҳокими, 1996—2001 йилларда Жиззах вилояти ҳокими, 2001—2003 йилларда Самарқанд вилояти ҳокими лавозимларида хизмат қилган. Ижро ҳокимиятидаги фаолияти билан бир пайтда 1995—2003 йилларда Олий Мажлис депутати сифатида қонунчилик жараёнида ҳам иштирок этган.
Шавкат Мирзиёев 2003 йилда Ўзбекистон бош вазири этиб тасдиқланиб, 2016 йилга қадар фаолият юритган. 2016 йил 4 декабрь куни бўлиб ўтган Президент сайлови якунлари бўйича сайловчиларнинг 88,61 фоиз овози билан Ўзбекистон президенти этиб сайланган. 2021 йил 24-октябрь куни бўлиб ўтган президент сайловида 80,1 фоиз овоз билан Ўзбекистон президенти этиб қайта сайланган. “Меҳнат шуҳрати” ва “Фидокорона хизматлари учун” орденлари билан тақдирланган.
Изоҳ (0)