O‘zbekiston prezidenti saylovida ishtirok etayotgan har bir nomzodga targ‘ibot tadbirlari uchun 4 milliard 914 million so‘m ajratilgan. Bu haqda Markaziy saylov komissiyasi aʼzosi Adham Ibodullayev “Daryo”ga maʼlum qildi.
“Mazkur pul mablag‘i siyosiy partiyalarga beriladi. Ular o‘zlari tashviqot tadbirlarini o‘tkazish uchun taqsimlaydi. Partiyalar saylovga 5 kun muddat qolganda mablag‘larni sarflanganligi yuzasidan Markaziy saylov komissiyasiga hisobot beradi. Unda mablag‘larni har bir ishlatilgan qismlari bo‘yicha maʼlumotlar aks etadi. Shuningdek, hisoboti har bir partiya o‘zining veb-saytida joylashtiradi”, — dedi Adham Ibaydullayev.
Uning qo‘shimcha qilishicha, agar mablag‘lar noto‘g‘ri sarflanganlik holati aniqlansa, nazorat organlari tomonidan qonunda belgilangan tartibda chora ko‘riladi.
O‘zbekiston prezidentligiga ko‘rsatilgan 4 nafar nomzod ro‘yxatga olingan.
O‘zbekiston prezidenti saylovini o‘tkazish uchun 174,1 mlrd so‘m ajratildi
Markaziy saylov komissiyasi 19-may kuni muddatidan ilgari O‘zbekiston prezidenti sayloviga bag‘ishlangan navbatdagi majlisida muddatidan ilgari prezident sayloviga tayyorgarlik ko‘rish va uning o‘tkazishga doir xarajatlar smetasi tasdiqlangan.
Markaziy saylov komissiyasi Saylov kodeksi talablariga rioya qilgan holda muddatidan ilgari prezidenti sayloviga tayyorgarlik ko‘rish va uni o‘tkazish bilan bog‘liq xarajatlar smetasini 174 milliard 130 million so‘m miqdorida ishlab chiqqan. Qayd etilishicha, mazkur mablag‘ avvalgi prezidentlik saylovi uchun ajratilgan mablag‘dan 41 foizga kam.
Yig‘ilishda umumpartiyaviy tadbirlar va siyosiy partiya tomonidan ko‘rsatilgan nomzodlarning saylovoldi tashviqoti va targ‘ibot ishlarini amalga oshirishga 19 milliard 655 million so‘m yoki saylovni moliyalashtirish uchun ajratilgan mablag‘larning 11 foizi miqdorida ajratilishi taʼkidlangan.
Xarajatlar smetasiga ko‘ra mablag‘larning deyarli 82 foizi okrug va uchastka saylov komissiyalarining faoliyatini tashkil etish uchun ajratilmoqda. Ushbu mablag‘larning 76 foizi okrug va uchastka saylov komissiyalari aʼzolari (aʼzolarning aksariyat qismi o‘qituvchi, shifokor, faol fuqarolar tarkibidan shakllantirilgan) mehnati uchun to‘lab beriladigan kompensatsiya to‘lovlari uchun sarflanishi uchun rejalashtirilgan.
2021-yilda bo‘lib o‘tgan O‘zbekiston prezidenti sayloviga tayyorgarlik ko‘rish va uni o‘tkazish bilan bog‘liq xarajatlarni moliyalashtirish uchun 300 milliard so‘m ajratilgan edi. Aprel oxirida o‘tkazilgan referendumga tayyorgarlik ko‘rish xarajatlari 182 milliard 386 million so‘mga baholangandi.
Izoh (0)