25-oktabr kuni Markaziy saylov komissiyasi matbuot markazida bo‘lib o‘tgan matbuot anjumanida O‘zbekiston prezidenti saylovining dastlabki natijalari e’lon qilindi.

Foto: Prezident matbuot xizmati

O‘zbekistonda prezident saylovi 2021-yil 24-oktabr kuni bo‘lib o‘tdi. Mamlakat bo‘ylab ochilgan 10 mingdan ortiq saylov uchastkalari tong soat 8:00 dan kech soat 20:00 ga qadar saylovchilarni qabul qildi. Markaziy saylov komissiyasi raisi Zayniddin Nizomxo‘jayev bergan ma’lumotga ko‘ra, saylovda jami ro‘yxatga olingan 20 158 907 nafar saylovchining 16 212 343 nafari, ya’ni saylovchilarning 80,4 foizi ovoz berdi. Saylov kodeksining 96-moddasiga muvofiq, agar saylovchilar ro‘yxatiga kiritilgan fuqarolarning 33 foizi ovoz berishda ishtirok etgan bo‘lsa saylov o‘tgan hisoblanadi.

Prezident saylovining dastlabki natijalariga ko‘ra,

  • Bahrom Abduhalimov (“Adolat”) — 3,4 foiz;
  • Narzullo Oblomurodov (Ekologik partiya) — 4,1 foiz;
  • Alisher Qodirov (Milliy tiklanish) — 5,5 foiz;
  • Maqsuda Vorisova (XDP) — 6,6 foiz;
  • Shavkat Mirziyoyev (O‘zLiDeP) — 80,1 foiz ovoz to‘plagan;

Saylovchilarning 50 foizdan ortiq ovozini olgani uchun Shavkat Mirziyoyev yana 5 yil muddatga O‘zbekiston prezidenti etib saylandi.

Ma’lumot uchun, Shavkat Mirziyoyev 1957-yil 24-iyulda Jizzax viloyatining Zomin tumanida shifokor oilasida tug‘ilgan. Millati — o‘zbek. Ma’lumoti — oliy. 1981-yilda Toshkent irrigatsiya va qishloq xo‘jaligini mexanizatsiyalash muhandislari institutini tamomlagan. Ixtisosligi — muhandis-mexanik. Texnika fanlari nomzodi, dotsent.

Mehnat faoliyatini 1981-yilda Toshkent irrigatsiya va qishloq xo‘jaligini mexanizatsiyalash muhandislari institutida kichik ilmiy xodimlikdan boshlab, katta o‘qituvchi, dotsent, o‘quv ishlari bo‘yicha prorektor lavozimlarida ishlagan. 1990-yilda Respublika Oliy Soveti deputati etib saylanib, Mandat komissiyasining raisi sifatida ham faoliyat yuritgan.

1992-yilda Toshkent shahrining Mirzo Ulug‘bek tumani hokimi, 1996—2001-yillarda Jizzax viloyati hokimi, 2001—2003-yillarda Samarqand viloyati hokimi lavozimlarida xizmat qilgan. Ijro hokimiyatidagi faoliyati bilan bir paytda 1995—2003-yillarda Oliy Majlis deputati sifatida qonunchilik jarayonida ham ishtirok etgan.

Shavkat Mirziyoyev 2003-yilda O‘zbekiston bosh vaziri etib tasdiqlanib, 2016-yilga qadar faoliyat yuritgan. 2016-yil 4-dekabr kuni bo‘lib o‘tgan Prezident saylovi yakunlari bo‘yicha saylovchilarning 88,61 foiz ovozi bilan O‘zbekiston prezidenti etib saylangan. “Mehnat shuhrati” va “Fidokorona xizmatlari uchun” ordenlari bilan taqdirlangan.

Oilali — ikki qizi, bir o‘g‘li, olti nafar nevarasi bor. Rafiqasi Ziroat Mirziyoyeva “Zamin” fondi vasiylik kengashi raisi sifatida faoliyat ko‘rsatmoqda.

Foto: Prezident matbuot xizmati

Markaziy saylov komissiyasi prezident saylovining dastlabki natijalarini e’lon qilgunga qadar Rossiya prezidenti Vladimir Putin Shavkat Mirziyoyevni telefon orqali prezidentlik saylovidagi ishonchli g‘alabasi bilan tabriklab, tabrik maktubi ham yo‘lladi. Rossiya prezidentidan so‘ng Belarus prezidenti Aleksandr Lukashenko ham Shavkat Mirziyoyevga qo‘ng‘iroq qilib, uni saylovdagi ishonchli g‘alabasi bilan tabrikladi va rejalarini amalga oshirishda muvaffaqiyatlar tiladi.