O‘zbekiston prezidentligiga ko‘rsatilgan nomzodlar ro‘yxatga olindi

Markaziy saylov komissiyasining 5-iyun kuni o‘tkazilgan navbatdagi majlisida O‘zbekiston prezidentligiga ko‘rsatilgan nomzodlar ro‘yxatga olindi, deb xabar beradi O‘zA.

Majlisda:

• Xalq demokratik partiyasidan Ulug‘bek Inoyatovni,
• Tadbirkorlar va ishbilarmonlar harakati – O‘zbekiston liberal-demokratik partiyasidan Shavkat Mirziyoyevni,
• O‘zbekiston “Adolat” sotsial-demokratik partiyasidan Robaxon Maxmudovani,
• O‘zbekiston Ekologik partiyasidan Abdushukur Xamzayevni, O‘zbekiston prezidentligiga nomzod etib ro‘yxatga olish to‘g‘risidagi qaror qabul qilingan.

Shuningdek, Markaziy saylov komissiyasining majlisida O‘zbekiston prezidentligiga nomzodlarning saylovoldi tashviqotini o‘tkazish masalasi muhokama etildi. Muhokama yakunida prezidentlikka nomzodlarning saylovoldi tashviqoti 2023-yil 7-iyundan boshlanishi qayd etilib, qaror qabul qilingan.

O‘zbekistonda muddatidan ilgari prezident saylovi o‘tkaziladi. Bu haqda Shavkat Mirziyoyev 8-may kuni referendum yakunlariga bag‘ishlangan uchrashuvda ma’lum qilgandi. O‘zbekistonda 2023-yil 9-iyul kuni muddatidan oldin prezidentlik saylovi o‘tkazilishi belgilangan.

Muddatidan ilgari O‘zbekiston prezidenti saylovi

“O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi qonun 6-may kuni prezident tomonidan imzolandi. Saylov kodeksiga kiritilgan o‘zgartirishlarga ko‘ra prezident muddatidan ilgari O‘zbekiston prezidenti saylovini tayinlagan taqdirda, saylov ushbu kodeksga to‘liq muvofiq holda 2 oy ichida o‘tkaziladi. Bunda saylovga tayyorgarlik ko‘rish hamda uni o‘tkazishga doir tadbirlarni amalga oshirish muddatlari Markaziy saylov komissiyasi tomonidan belgilanadi.