“Biri turmush o‘rtog‘i bilan kelsa, boshqasi o‘g‘li bilan, yana biri esa nabirasi yonida”. O‘zbekistondagi shahar, tuman hokimlarining saylovdagi faolligi qay darajada bo‘ldi?

Bugun O‘zbekistondagi eng katta siyosiy jarayonlardan biri — muddatidan avvalgi prezidentlik saylovi bo‘lib o‘tdi. Mazkur jarayonda o‘zbekistonlik aholining faolligi ancha ortgan bo‘lsa, amaldorlar ishtiroki ham yetarli darajada bo‘ldi, desak xato qilmagan bo‘lamiz. Xo‘sh, hududlardagi tuman va shahar hokimlari qanchalik aholiga namuna bo‘la oldi? “Daryo” mazkur savollarga javob topish ilinjida hokimliklarning axborot xizmati vakillari bilan bog‘lanib, shahar, tuman rahbarlarining prezidentlik saylovidagi ishtirokini tasdiqlovchi fotosuratlardan so‘radi.

“Daryo” so‘roviga javob bergan Toshkent viloyatidagi mavjud tuman va shahar hokimliklaridan Chirchiq shahri, Yangiyo‘l, Yuqori Chirchiq, Piskent, Bo‘ka va Bekobod tumani hokimliklarining axborot xizmatlari hudud rahbarlarining saylovda ishtirokini isbotlovchi suratlarni taqdim qildi.

Yuqori Chirchiq tumani hokimi Uskenbay Atemov prezidentlik saylovida turmush o‘rtog‘i, o‘g‘li, kelini va nabiralari bilan birga ishtirok etgan bo‘lsa, Bo‘ka tumani hokimi Nizomiddin Abbosov o‘g‘li bilan ko‘rinish berdi. Chirchiq shahri hokimi Davron Hidoyatov hamda Bekobod tumani hokimi Furqat Xudoyberdiyevlar saylov uchastkasiga bir o‘zi kelib, fuqaro sifatidagi xohish-irodasini namoyon etdi. Yangiyo‘l tumani hokimi Ulug‘bek Yalgashev, Piskent tumani hokimi Nodirbek Yakubovlar esa saylovda oilaviy ko‘rinish berib, fuqarolik burchini bajargan.

“Daryo” muxbiri Umidjon Mamarasulovning aniqlashtirishicha, Andijon viloyatida esa sakkiz nafar hokim saylovda faol ishtirok etib, o‘zi rahbarlik qilayotgan hududdagi aholiga namuna bo‘la olgan.

“Daryo” muxbiri kuzatuvlariga ko‘ra, saylovdagi faollik borasida Qashqadaryo viloyatida faoliyat yurituvchi hokimlar ancha ilg‘or.

Jumladan, Qarshi shahri hokimi Normo‘min Xolboyev, Qarshi tumani hokimi Behzod Yusupov, Qamashi tumani hokimi Botir Tog‘ayev, Kitob tumani hokimi O‘ktam Pardayev, Ko‘kdala tumani hokimi Xurram Jo‘rayev, Chiroqchi tumani hokimi Nodir Erkayev, G‘uzor tumani hokimi Bekzod Suyunov, Mirishkor tumani hokimi Sherali Sanayev, Nishon tumani hokimi Muxtor Hayitmurodov yakka bo‘lsa-da, ko‘rinish berib, siyosiy faollik borasida tumandoshlariga o‘rnak bo‘lgan.

Dehqonobod tumani hokimi Zoir Aliqulov, Muborak tumani hokimi Akrom Aripov, Kasbi tumani hokimi To‘xtamurod Meyliyevlar saylovda oilaviy ishtirok etib, nafaqat o‘zi, oilasi ham o‘zi kabi faol ekanini namoyon qilgan. Va prezidentlik saylovida o‘z xohish-irodasini bildirgan.