Bugun, 9-iyul — O‘zbekiston prezidentining muddatidan ilgari saylovi bo‘lib o‘tdi. Saylovda ovoz berish jarayoni soat 08:00 dan 20:00 gacha o‘tkazildi.
“Ertab soat 08:00 da mamlakatimizda tashkil etilgan 10 ming 784 ta saylov uchastkasida O‘zbekiston davlat madhiyasi yangradi va saylovchilar ovoz berishni boshladi. Shuningdek, O‘zbekiston Respublikasining 39 ta xorijiy davlatdagi vakolatxonalari huzurida tuzilgan 56 ta saylov uchastkasi, xususan, sharq mamlakatlarida tuzilgan saylov uchastkalari o‘z ishini boshladi”, — dedi Markaziy saylov komissiyasi raisi Zayniddin Nizomxo‘jayev.
Maʼlum qilinishicha, joriy yilning 28-iyunidan to 5-iyuligacha o‘tkazilgan muddatidan oldin ovoz berish imkoniyatidan 815 ming 313 nafar saylovchi foydalangan.
Markaziy saylov komissiyasi tomonidan o‘tkazilgan brifingda ichki ishlar vaziri o‘rinbosari Bekmurod Abdullayevning aytishicha, amaldagi qonunchilikka ko‘ra, saylov o‘tkazish tartibini buzganlik uchun javobgarlik belgilangan.
“Uchastka saylov komissiyasi faoliyatiga aralashish ham huquqbuzarlik hisoblanadi”, — dedi vazir o‘rinbosari.
O‘tkazilgan brifingda Oliy sud raisi o‘rinbosari Halilillo To‘raxo‘jayev Prezident saylovi milliy qonunchiligimiz va umumeʼtirof etilgan xalqaro demokratik tamoyillar asosida o‘tkazilganini maʼlum qildi.
Markaziy saylov komissiyasi maʼlumotlariga ko‘ra, soat 17:00 holatiga, 13 mln 459 ming 677 nafar fuqaro yoki umumiy ovoz beruvchilarning 69,85 foizi saylovda ovoz berdi.
Izoh (0)