Favqulodda vaziyatlar vazirligi Toshkent shahar Bektemir tumanida sodir bo‘lgan yong‘in bo‘yicha ma’lumot berdi.
Qayd etilishicha, 25-may kuni soat 02:30 da tumanning “Mirishkor” MFY Chirchiq bo‘yi ko‘chasida joylashgan tadbirkorlik subyektiga qarashli hududda chiqindi moy mahsulotini qayta ishlash vaqtida sig‘imning yorilib ketishi natijasida yong‘in yuzaga kelgan.
Shunga ko‘ra sakkizta yong‘in-qutqaruv ekipaji soat 02:32 da voqea joyiga yetib borib, yong‘in soat 03:09 da o‘rab olingan va soat 03:16 da o‘chirilgan.
Yong‘in oqibatida 150 kvadrat metr maydonda chiqindi moy mahsulotlari yongan. Tan jarohati olgan va halok bo‘lganlar yo‘q.
O‘zbekistonda kuzatilayotgan yong‘in holatlari
5-may kuni Buxorodagi mehmonxona balkonida yong‘in sodir bo‘lgandi. 9-may kuni esa Samarqand viloyati Paxtachi tumanidagi gaz korxonasida portlash sodir bo‘lgani to‘g‘risida xabar berilgan. Hodisa shoxobchadagi MAN rusumli suyultirilgan gaz tashuvchi avtomashinadan gazni zaxira sig‘imiga bo‘shatish jarayonida texnika xavfsizligi qoidalarining buzilishi oqibatida yuzaga kelgani taxmin qilinmoqda. Shuningdek, Toshkent shahri Yunusobod tumanidagi ko‘p qavatli uyda 11-may kuni yong‘in sodir bo‘lgan edi.
Izoh (0)