Singapur prezidenti Halima Yaqub boshchiligidagi delegatsiya O‘zbekiston prezidenti huzuridagi Davlat boshqaruvi akademiyasiga tashrif buyurdi, deb xabar beradi O‘zA.
Qayd etilishicha, tashrif davomida Davlat boshqaruvi akademiyasi professor-o‘qituvchilari, bir guruh iqtidorli yoshlar ishtirokida davra suhbati tashkil qilingan. Shu bilan birga, O‘zbekiston—Singapur qo‘shma taʼlim markazining tantanali ochilish marosimi bo‘lib o‘tgan.
Markaz kadrlar zaxirasiga kiritilgan davlat xizmatchilarimizning Davlat xizmati kolleji, Li Kuan Yu nomidagi davlat boshqaruvi maktabi kabi Singapurning nufuzli taʼlim muassasalarida malaka oshirishini tashkil qilish bilan shug‘ullanadi.
Bundan tashqari, taʼlim markazida zamonaviy jihozlangan kovorking maydoni tashkil qilinib, bu yerda singapurlik ekspertlar jalb qilingan holda ustuvor loyihalarni amalga oshirish bo‘yicha hamkorlik olib boriladi.
Shavkat Mirziyoyevning taklifiga binoan Singapur prezidenti Halima Yaqub 23-may kuni davlat tashrifi bilan O‘zbekistonga kelgandi. Oliy martabali mehmon va Singapur delegatsiyasi a’zolari “Yangi O‘zbekiston” bog‘iga tashrif buyurib, Mustaqillik monumenti poyiga gul qo‘ydi, O‘zbekistonning istiqlol yillaridagi rivojlanishi va ushbu betakror majmuaning yaratilish tarixi bilan tanishdi, milliy madaniy markazlar vakillari bilan uchrashdi.
24-may kuni Shavkat Mirziyoyev va Singapur prezidenti huzurida ikki tomonlama hujjatlarni almashish marosimi bo‘lib o‘tdi.
Izoh (0)