Qashqadaryo viloyatining G‘uzor tumanida quvvati 300 megavatt bo‘lgan quyosh fotoelektr stansiyasini qurish va undan foydalanish bo‘yicha o‘tkazilgan tender tanlovida dastlabki g‘olibi e‘lon qilindi. Bu haqda Energetika vazirligi matbuot xizmati xabar berdi.
.jpg)
Mazkur loyiha Osiyo taraqqiyot banki ko‘magida “Umumiy quvvati 300 MVt bo‘lgan quyosh fotoelektr stansiyasi qurish loyihasini ishlab chiqish va maslahat xizmatlarini ko‘rsatish Dasturi” (ADB Phase 2) doirasida amalga oshirilgan bo‘lib, unga ikkita xalqaro kompaniya qiziqish bildirgan. Moliyaviy takliflarning ochilish natijalari:
- Abu Dhabi Future Energy Company PJSC — Masdar (BAA) kompaniyasi tomonidan quyosh elektr stansiyasidan ishlab chiqariladigan 1 kVt/soat elektr energiyasi uchun 3 AQSH senti hamda akkumulator tizimining 1 MVt/soat mavjudligi uchun 6,33 AQSH dollari;
- ACWA POWER-Saudi Listed Joint Stock Company (Saudiya Arabistoni) kompaniyasi tomonidan quyosh elektr stansiyasidan ishlab chiqariladigan 1 kVt/soat elektr energiyasi uchun 3,0518 AQSH senti hamda akkumulator tizimining 1 MVt/soat mavjudligi uchun 24,425 AQSH dollari taklif qilingan.
“Qashqadaryo viloyati G‘uzor tumanida quvvati 300 megavatt bo‘lgan quyosh fotoelektr stansiyasini qurish” loyihasi doirasida Masdar kompaniyasi tenderning dastlabki g‘olibi, ACWA POWER-Saudi Listed Joint Stock Company esa kompaniyasi tenderning zaxira g‘olibi deb e‘lon qilingan.
Tanlov hujjatlari yaqin kunlarda Tender komissiyasi tomonidan OTB maslahatchilari ishtirokida ko‘rib chiqiladi va tasdiqlanadi.
Mazkur tanlov O‘zbekiston Energetika vazirligi, Investitsiyalar, sanoat va savdo vazirligi, “O‘zbekiston milliy elektr tarmoqlari” AJ, Iqtisodiyot va moliya vazirligi va Raqobatni rivojlantirish va iste‘molchilar huquqlarini himoya qilish qo‘mitasi tomonidan o‘tkazilgan. Moliyaviy takliflarning talab etilgan mezonlarga muvofiqligi baholagandan so‘ng, loyihani amalga oshiradigan investorning nomi e‘lon qilingan.
Loyiha G‘uzor tumanidagi 300 megavatt quvvatga ega quyosh fotoelektr stansiyasi va 1 soat davomida 75 megavatt quvvat beradigan energiya saqlash tizimi (akkumulator)ni o‘z ichiga oladi.
Tenderda g‘olib bo‘lgan investor quyosh fotoelektr stansiyasini loyihalashtiradi, moliyalashtiradi va boshqaradi.
Quyosh fotoelektr stansiyalarining qurilishi
O‘zbekistonda 2021-yilning may oyida Samarqand viloyatining Kattaqo‘rg‘on tumani va Jizzax viloyatining G‘allaorol tumanida har biri 220 MVt quvvatga ega ikkita yangi quyosh elektr stansiyasini davlat-xususiy sheriklik doirasida qurish bo‘yicha tender g‘olibi e’lon qilingandi. BAAning qayta tiklanadigan energiya sohasidagi Masdar kompaniyasi mamlakatda va Markaziy Osiyo mintaqasida elektr energiyasi ishlab chiqarishga eng past tariflarini taklif qilgan.
Samarqand va Jizzax viloyatlaridagi quyosh elektrostansiyalari yiliga 1,1 milliard kilovatt-soatgacha qayta tiklanadigan elektr energiyasi ishlab chiqarish imkoniyatiga ega bo‘ladi. Ularning ishlashi tufayli yiliga o‘rtacha 110 ming tonna yoki ularning butun xizmat davri davomida jami 3,4 million tonna karbonat angidrid emissiyasining oldi olinadi.
Ushbu loyiha “Quyosh energetikasini kengaytirish” dasturi ko‘magida amalga oshirilmoqda. Uning doirasida avvalroq IFC tender o‘tkazish bo‘yicha maslahat xizmatlarini ko‘rsatgan, Jahon banki esa stansiyalar tomonidan ishlab chiqarilgan elektr energiyasini sotib olish bo‘yicha jami 12 million AQSH dollarigacha bo‘lgan (har biri uchun 6 million AQSH dollaridan) majburiyatlarni bajarishi uchun bank kafolatlarini taqdim etadi.
Quyosh elektrostansiyalarini ishga tushirish uchun Masdar loyiha kompaniyalariga o‘z kapitalidan 193 million dollar investitsiya kiritadi. Masdar, shuningdek, Osiyo taraqqiyot banki, Yevropa tiklanish va taraqqiyot banki, Yevropa investitsiya banki hamda Osiyo infratuzilma investitsiyalari banki tomonidan 216 million dollar qarz mablag‘larini jalb qiladi.
Izoh (0)