Фавқулодда вазиятлар вазирлиги Тошкент шаҳар Бектемир туманида содир бўлган ёнғин бўйича маълумот берди.
Қайд этилишича, 25 май куни соат 02:30 да туманнинг “Миришкор” МФЙ Чирчиқ бўйи кўчасида жойлашган тадбиркорлик субъектига қарашли ҳудудда чиқинди мой маҳсулотини қайта ишлаш вақтида сиғимнинг ёрилиб кетиши натижасида ёнғин юзага келган.
Шунга кўра саккизта ёнғин-қутқарув экипажи соат 02:32 да воқеа жойига етиб бориб, ёнғин соат 03:09 да ўраб олинган ва соат 03:16 да ўчирилган.
Ёнғин оқибатида 150 квадрат метр майдонда чиқинди мой маҳсулотлари ёнган. Тан жароҳати олган ва ҳалок бўлганлар йўқ.
Ўзбекистонда кузатилаётган ёнғин ҳолатлари
5 май куни Бухородаги меҳмонхона балконида ёнғин содир бўлганди. 9 май куни эса Самарқанд вилояти Пахтачи туманидаги газ корхонасида портлаш содир бўлгани тўғрисида хабар берилган. Ҳодиса шохобчадаги MAN русумли суюлтирилган газ ташувчи автомашинадан газни захира сиғимига бўшатиш жараёнида техника хавфсизлиги қоидаларининг бузилиши оқибатида юзага келгани тахмин қилинмоқда. Шунингдек, Тошкент шаҳри Юнусобод туманидаги кўп қаватли уйда 11 май куни ёнғин содир бўлган эди.
Изоҳ (0)