Toshkent shahrida 24-may kuni O‘zbekiston—Singapur biznes-forumi bo‘lib o‘tdi. Bu haqda Investitsiyalar, sanoat va savdo vazirligi axborot xizmati xabar berdi.
Tadbirdan asosiy maqsad ishtirokchilarni mamlakatlar milliy iqtisodiyotining raqobatdosh ustunliklar va drayverlari haqida xabardorligini oshirish, shuningdek, ikki davlat hukumati va ishbilarmon doiralari o‘rtasida yangi hamkorlik aloqalarini o‘rnatishdan iborat bo‘ldi.
Biznes-forumda Singapur prezidenti Halima Yaqub, O‘zbekiston bosh vaziri o‘rinbosari Jamshid Xo‘jayev, ikki mamlakatning tegishli vazirlik va idoralari, tarmoq birlashmalari rahbarlari, Meinhardt, PSA International, Wilmar International, “Changi xalqaro aeroporti”, EINZ Engineering & Construction, Lazada Group, MSI Global, Engarde Ventures, TMC kabi yirik kompaniyalar rahbarlari ishtirok etdi.
Jamshid Xo‘jayev biznes-forum ishtirokchilariga murojaat qilib, O‘zbekiston bilan Singapur o‘rtasidagi hamkorlik rivojlanishining ijobiy dinamikasini yuqori baholadi. U, shuningdek, Shavkat Mirziyoyevning joriy yil 17-yanvardagi Singapurga tashrifi ikki mamlakat o‘rtasidagi o‘zaro manfaatli munosabatlarning yangi sahifasini ochgani va natijada 3,8 milliard dollarlik investitsiya loyihalari portfeli shakllanganini qayd etdi.
Singapur va O‘zbekiston o‘rtasidagi tashqi savdo munosabatlari ham izchil rivojlanib borayotgani ta’kidlandi. 2023-yil boshidan buyon uning hajmi o‘tgan yilning shu davriga nisbatan bir necha baravar o‘sdi. Investitsiya sohasidagi munosabatlar va sanoat kooperatsiyasi yo‘nalishida hamkorlik kengaytirilmoqda. Singapur kapitali ishtirokidagi qo‘shma korxonalar soni so‘nggi yetti yilda 3,5 barobar oshdi.
Singapurning yirik kompaniyalari bilan “yashil” energetika, qishloq xo‘jaligi, farmatsevtika sanoati, ta’lim, turizm, infratuzilmaviy rivojlanish va davlat kompaniyalari aktivlarini xususiylashtirish bo‘yicha qo‘shma loyihalar amalga oshirilmoqda va ishlab chiqilmoqda.
O‘zbekistonda investitsiya muhitini yaxshilash bo‘yicha amalga oshirilayotgan bir qator vazifalar haqida so‘z bordi. Mamlakatda ma’muriy islohot amalga oshirildi, JSTga a’zo bo‘lish jarayoni faollashtirildi, Konstitutsiyaga erkin fuqarolik jamiyatini rivojlantirish, inson kapitalini mustahkamlash, tadbirkorlik erkinligini, investorlar huquqlari, xususiy mulk daxlsizligini ta’minlashga qaratilgan qo‘shimcha va o‘zgartirishlar kiritildi.
O‘z navbatida, Singapur prezidenti Halima Yaqub sarmoyaviy, savdo-iqtisodiy va sanoat kooperatsiyasidagi sheriklik ustuvor ahamiyatga ega ekanligini ta’kidladi. Singapur prezidenti oliy darajadagi o‘zaro tashrif natijalarini yuqori baholab, muhim yo‘nalishlar bo‘yicha hamkorlikni yanada mustahkamlashga sodiqligini bildirdi.
Yuqori martabali mehmonlar ishbilarmon doira vakillariga murojaat qilib, hukumat vakillari qo‘shma loyiha va tashabbuslarni amalga oshirishni har tomonlama qo‘llab-quvvatlashga tayyor ekanini yana bir bor tasdiqladi hamda kompaniya va korporatsiya rahbarlarini hamkorlikni kengaytirishga, o‘zaro manfaatli yangi shartnoma va bitimlar tuzishga chaqirdi.
Tadbir doirasida ta’lim, transport, shaharsozlik va moliyaviy sohalarda hamkorlikni rivojlantirish masalalariga bag‘ishlangan panel munozaralari ham bo‘lib o‘tdi. Biznes-forum yakunida O‘zbekiston va Singapur ishbilarmon doiralarini qiziqtirgan qator yo‘nalishlar bo‘yicha mustahkam investitsiyaviy bitim va savdo shartnomalari imzolandi.
Izoh (0)