Rossiya Tashqi ishlar vazirligi (TIV) mamlakat Xavfsizlik kengashi raisi o‘rinbosari Dmitriy Medvedev Kollektiv xavfsizlik shartnomasi tashkiloti (KXSHT) bosh kotibiga yo‘llagan maktub internetda tarqalgani yuzasidan izoh berdi va uni “qalbaki” deb atadi.
Ijtimoiy tarmoqlarda paydo bo‘lgan suratda “maktub” aks etgan bo‘lib, unda, go‘yoki, Medvedevning nomidan KXSHT davlatlariga “harbiy yordam” so‘rab murojaat qilingan.
“E’tiboringizni shunga qaratamizki, ijtimoiy tarmoqlarda paydo bo‘lgan, go‘yoki Rossiya Federatsiyasi Xavfsizlik kengashi raisi o‘rinbosari Dmitriy Medvedevning KXSHT bosh kotibiga yo‘llangan xati mahoratsizlarcha yasalgan qalbaki suratdir, u ittifoqdoshlarimiz bilan aloqalarimizga sovuqchilik tushirib, KXSHTning birligiga putur yetkazishga qaratilgani aniq”, — deyiladi Rossiya TIV xabarida.
Idora qayd etishicha, maktubning shtrix-kodi ochiq tarmoqda mavjud bo‘lgan boshqa xatdan olingan, u esa Rossiya TIV tomonidan MGIMO (Moskva davlat xalqaro aloqalar instituti) rektoriga yo‘llangan, bunday chiquvchi raqamga ega xat esa umuman mavjud emas (joriy yil tartib raqamlaridan kelib chiqqanda).
Shuningdek, Rossiya Xavfsizlik kengashi raisi o‘rinbosari lavozimi Xavfsizlik kengashi apparatiga tegishli emas, noto‘g‘ri xat blankasi uning qalbakiligini bildirib qo‘ygan.
“Bunday provokatsiya tashabbuskorlarining barchasini ishontirishni xohlardikki, Rossiyaning harbiy salohiyati nafaqat Rossiya fuqarolari va hududi xavfsizligini kafolatli ta’minlash uchun, balki uning KXSHT bo‘yicha ittifoqdoshlari uchun ham yetarlidir”, — deya ma’lum qilishdi Rossiya TIVda.
Bu Dmitriy Medvedev nomidan “qalbaki bayonotlar” berilishi bilan bog‘liq birinchi holat emas. Chunonchi, u avgust boshida “VKontakte”dagi sahifasida post qoldirib, Qozog‘istonni ruslarga nisbatan genotsidda ayblagan va SSSR qayta tiklanishini ma’lum qilgan edi. Keyinroq uning yordamchisi Oleg Osipov Medvedevning “VKontakte” ijtimoiy tarmog‘idagi sahifasi xakerlar hujumiga uchragani haqida xabar berdi.
KXSHT urushda qatnashmaydi
Avvalroq Qozog‘iston KXSHT Ukrainaga qarshi urushda qatnashmasligini ma’lum qildi. “Qozog‘iston xalqaro huquq va BMT ustaviga muvofiq, davlatning hududiy yaxlitligi va suveren tengligi tamoyillaridan kelib chiqadi. Umuman olganda, KXSHTning mas’uliyat zonasi tashkilotga a’zo davlatlarning xalqaro tan olingan hududlari bilan chegaralangan, va kollektiv xavfsizlik ushbu hududlar ichkarisida ta’minlanadi. Shu tariqa, KXSHTning Rossiya-Ukraina nizosidagi ishtiroki kun tartibida yo‘q”, — dedi Qozog‘iston Tashqi ishlar vazirligi rasmiy vakili Aybek Smadiyarov.KXSHT nima?
Kollektiv xavfsizlik shartnomasi tashkiloti — ayni paytda Armaniston, Belarus, Qozog‘iston, Qirg‘iziston, Rossiya va Tojikistonni o‘z ichiga olgan Yevrosiyo hukumatlararo harbiy ittifoqi. Tashkilotni tuzish haqidagi shartnoma 1992-yil 15-mayda imzolangan.KXSHT maqsadlari tinchlikni, xalqaro va mintaqaviy xavfsizlik va barqarorlikni mustahkamlash, a’zo davlatlar mustaqilligi, hududiy yaxlitligi va suverenitetini kollektiv asosda himoyalashdan iborat.
Izoh (0)