Putin Ukraina hududlarini anneksiya qilish haqidagi qonunlarni imzoladi va yangi subyektlar rahbarlarini tayinladi

Rossiya prezidenti Vladimir Putin o‘zini o‘zi respublika deb e’lon qilgan Donetsk va Lugansk xalq respublikalari, shuningdek, bosib olingan Xerson va Zaporojye viloyatlarining “Rossiya Federatsiyasi tarkibiga kirishi to‘g‘risidagi shartnomalarni” ratifikatsiya qiluvchi federal qonunlarni imzoladi.

U, shuningdek, to‘rtta yangi subyektning “Rossiya Federatsiyasiga qabul qilinishi” to‘g‘risidagi federal konstitutsiyaviy qonunlarni imzoladi.

Putin Rossiyaning yangi subyektlari muvaqqat rahbarlarini ham tayinladi — ushbu lavozimlarga Rossiyaga qo‘shilishdan oldin mazkur hududlarni boshqargan ma’muriyat rahbarlari tayinlandi:

Denis Pushilin — DXR rahbari vazifasini bajaruvchi;Leonid Pasechnik — LXR rahbari vazifasini bajaruvchi;Vladimir Saldo — Xerson viloyati gubernatori vazifasini bajaruvchi;Yevgeniy Balitskiy — Zaporojye viloyati gubernatori vazifasini bajaruvchi etib tayinlandi.

3-oktabr kuni davlat Dumasi anneksiya to‘g‘risidagi qonunlarni qabul qilgandi, ertasi kuni ularni Federatsiya Kengashi tasdiqladi. Bularning barchasi bir ovozdan amalga oshirildi.