Eron Ukrainaning Lugansk, Donetsk, Xerson va Zaporojye viloyatlarida o‘tkazilgan “referendumlar”ni hamda bu viloyatlarning Rossiyaga qo‘shib olinishini tan olmaydi. Bu haqda mamlakat Tashqi ishlar vazirligi matbuot kotibi Nosir Kenani matbuot anjumanida ma’lum qildi.
Uning so‘zlariga ko‘ra, Eron har doim mamlakatlarning hududiy yaxlitligi tamoyiliga hamda BMT Nizomi tamoyillari va maqsadlariga to‘liq hurmat ko‘rsatish zarurligini ta’kidlab keladi.
Kenani shuningdek, Eron Ukrainaga qarshi urushda foydalanish uchun Rossiyaga jangovar dronlar yetkazib berayotganini rad etdi.
“Eron Islom respublikasi Ukraina mojarosida foydalanish uchun Rossiyaga dronlar yetkazib berilayotgani haqida tarqalgan xabarlarni asossiz deb hisoblaydi va ularni tasdiqlamaydi”, — dedi vazirlik matbuot kotibi.
Avgust oyida Eron Rossiyaga jangovar dronlarning birinchi partiyasini yuborgani haqida ma’lumot paydo bo‘lgandi.
Sentabr oyida Rossiya kuchlari Ukrainaning orqa shaharlariga hujum qilish uchun Shahed-136 kamikadze-dronlaridan ommaviy ravishda foydalanishni boshlagan.
Izoh (0)