Россия Ташқи ишлар вазирлиги (ТИВ) мамлакат Хавфсизлик кенгаши раиси ўринбосари Дмитрий Медведев Коллектив хавфсизлик шартномаси ташкилоти (КХШТ) бош котибига йўллаган мактуб интернетда тарқалгани юзасидан изоҳ берди ва уни «қалбаки» деб атади.
Ижтимоий тармоқларда пайдо бўлган суратда «мактуб» акс этган бўлиб, унда, гўёки, Медведевнинг номидан КХШТ давлатларига «ҳарбий ёрдам» сўраб мурожаат қилинган.
«Эътиборингизни шунга қаратамизки, ижтимоий тармоқларда пайдо бўлган, гўёки Россия Федерацияси Хавфсизлик кенгаши раиси ўринбосари Дмитрий Медведевнинг КХШТ бош котибига йўлланган хати маҳоратсизларча ясалган қалбаки суратдир, у иттифоқдошларимиз билан алоқаларимизга совуқчилик тушириб, КХШТнинг бирлигига путур етказишга қаратилгани аниқ», — дейилади Россия ТИВ хабарида.
Идора қайд этишича, мактубнинг штрих-коди очиқ тармоқда мавжуд бўлган бошқа хатдан олинган, у эса Россия ТИВ томонидан МГИМО (Москва давлат халқаро алоқалар институти) ректорига йўлланган, бундай чиқувчи рақамга эга хат эса умуман мавжуд эмас (жорий йил тартиб рақамларидан келиб чиққанда).
Шунингдек, Россия Хавфсизлик кенгаши раиси ўринбосари лавозими Хавфсизлик кенгаши аппаратига тегишли эмас, нотўғри хат бланкаси унинг қалбакилигини билдириб қўйган.
«Бундай провокация ташаббускорларининг барчасини ишонтиришни хоҳлардикки, Россиянинг ҳарбий салоҳияти нафақат Россия фуқаролари ва ҳудуди хавфсизлигини кафолатли таъминлаш учун, балки унинг КХШТ бўйича иттифоқдошлари учун ҳам етарлидир», — дея маълум қилишди Россия ТИВда.
Бу Дмитрий Медведев номидан «қалбаки баёнотлар» берилиши билан боғлиқ биринчи ҳолат эмас. Чунончи, у август бошида «ВКонтакте»даги саҳифасида пост қолдириб, Қозоғистонни русларга нисбатан геноцидда айблаган ва СССР қайта тикланишини маълум қилган эди. Кейинроқ унинг ёрдамчиси Олег Осипов Медведевнинг «ВКонтакте» ижтимоий тармоғидаги саҳифаси хакерлар ҳужумига учрагани ҳақида хабар берди.
КХШТ урушда қатнашмайди
Аввалроқ Қозоғистон КХШТ Украинага қарши урушда қатнашмаслигини маълум қилди. «Қозоғистон халқаро ҳуқуқ ва БМТ уставига мувофиқ, давлатнинг ҳудудий яхлитлиги ва суверен тенглиги тамойилларидан келиб чиқади. Умуман олганда, КХШТнинг масъулият зонаси ташкилотга аъзо давлатларнинг халқаро тан олинган ҳудудлари билан чегараланган, ва коллектив хавфсизлик ушбу ҳудудлар ичкарисида таъминланади. Шу тариқа, КХШТнинг Россия-Украина низосидаги иштироки кун тартибида йўқ», — деди Қозоғистон Ташқи ишлар вазирлиги расмий вакили Айбек Смадияров.КХШТ нима?
Коллектив хавфсизлик шартномаси ташкилоти — айни пайтда Арманистон, Беларусь, Қозоғистон, Қирғизистон, Россия ва Тожикистонни ўз ичига олган Евросиё ҳукуматлараро ҳарбий иттифоқи. Ташкилотни тузиш ҳақидаги шартнома 1992 йил 15 майда имзоланган.КХШТ мақсадлари тинчликни, халқаро ва минтақавий хавфсизлик ва барқарорликни мустаҳкамлаш, аъзо давлатлар мустақиллиги, ҳудудий яхлитлиги ва суверенитетини коллектив асосда ҳимоялашдан иборат.
Изоҳ (0)