Inson huquqlarini himoya qilish bo‘yicha tashkilotlar vakillari Turkiya prezidenti Rajab Toyyib Erdo‘g‘onga ochiq murojaat yo‘llab, undan Turkmaniston fuqarolari uchun vizasiz rejimni qaytarishni so‘radi.
2022-yilning 13-sentabr kuni Anqara Turkmaniston iltimosiga ko‘ra ushbu davlat fuqarolarining Turkiyaga kirishi uchun viza rejimini joriy qilgandi. Shu tariqa, Turkiya Vazirlar kengashining 2007-yil 19-iyuldagi qarori bekor qilindi, unga muvofiq turkmanistonliklar Turkiyada 30 kungacha turistik maqsadlarda vizasiz yurishi mumkin edi.
Huquq himoyachilari o‘z murojaatlarida vizasiz rejimning bekor qilinishini “Turkmaniston fuqarolarining erkin harakatlanish huquqini kamsitish” va “Turkiya respublikasi tashqi siyosatining muhim qismi bo‘lgan turk xalqlarining ochiqligi va birlashuvi tamoyillarini buzish” deb atadi.
Aslida Turkmaniston Turkiya hisobidan yuz minglab turkmanlarning mamlakatdan chiqib ketishini taqiqlab, o‘z fuqarolariga nisbatan repressiv siyosatga Turkiya respublikasini jalb qildi.Qayd etilishicha, ayni paytda Turkiyada 230 mingga yaqin qonuniy istiqomat qiluvchi turkmanlar bor. Turkmanistondan mehnatga layoqatli aholining chiqib ketishini to‘xtatish uchun rasmiylar turli choralar ko‘rmoqda, jumladan, ularning mamlakatdan chiqib ketishini sud qarorisiz cheklamoqda.Turkmaniston prezidentlarining iqtisodni yakka tartibda va savodsizlarcha boshqarishi, ularning cheksiz boyib ketishi va ulkan korrupsiyasi chuqur iqtisodiy inqirozga va Turkmaniston aholisining ommaviy qashshoqlashishiga olib keldi. Jahon darajasidagi yirik uglevodorod resurslariga ega ushbu mamlakatda shaharlarda o‘rtacha ish haqi bor-yo‘g‘i 70 dollar, o‘rtacha pensiya esa 27 dollarni tashkil qiladi. Mamlakatda, ayniqsa, qishloq joylarida ishsizlik katta va davosiz dardga aylandi. Bu shundoq ham rekord darajada past bo‘lgan aholi turmush darajasining yanada pasayishiga olib kelmoqda. Ochlik kam ta’minlangan Turkmaniston fuqarolarining tobora ko‘proq qatlamini qamrab olmoqda.
Turkmanistonlik mehnat muhojirlarining aksariyati tirik qolish va oilalarini boqish uchun Turkiyaga ko‘chib ketishni afzal ko‘rardi. Turkiya turkmanlar uchun qardosh mamlakat, xalqlarimizni nafaqat til va mentalitetning yaqinligi, balki mushtarak tarixiy ildizlar ham birlashtiradi. Turkmanistondagi iqtisodiy vaziyatning yomonlashuvi Turkiyaga mehnat migratsiyasi ortishiga sabab bo‘lmoqda, — deyiladi huquq himoyachilarining murojaatida.
Turkiya tomonidan viza rejimi joriy etilishi Turkmaniston fuqarolarining o‘z mamlakatidan tashqariga chiqishiga qo‘shimcha cheklov bo‘ldi. Shu munosabat bilan huquq himoyachilari Erdo‘g‘ondan Turkmaniston fuqarolari uchun viza rejimini bekor qilishni so‘radi.
Murojaat Niderlandiya va Bolgariyada yashovchi turkmanistonliklar huquqlarini himoya qilishga ixtisoslashgan huquq himoyachilari tomonidan imzolangan.
Izoh (0)