Pentagon matbuot kotibi Lora Kuperning aytishicha, Ukraina HIMARS baravar o‘t ochuvchi reaktiv tizimlaridagi GMLRS snaryadlari bilan jang maydonidagi nishonlarning aksariyatiga zarba berishga qodir. Uning qo‘shimcha qilishicha, bu Qrim hududiga ham taalluqli, chunki yarimorol Ukrainaga tegishli, deb hisoblanadi.
“Hisob-kitoblarimizga ko‘ra, yangi harbiy yordam paketimizga qo‘shimcha ravishda taqdim etilayotgan HIMARS’da mavjud GMLRS tizimlari bilan ular jang maydonida ko‘plab nishonlarga hujum qilishga qodir”, — dedi Lora Kuper brifingda ATACMS uzoq masofali raketalarini Ukrainaga yetkazib berish ehtimoli haqidagi savolga javoban.
Uning so‘zlariga ko‘ra, GMLRS Qrimdagi nishonlarga ham yeta oladi. “Shunchaki aniqlashtirib ketmoqchiman: Qrim — bu Ukraina”, — deb qo‘shimcha qildi Kuper.
Iyul oyida Oq uy Ukrainaga 300 km masofaga uchadigan ATACMS raketalarini yetkazib berishdan bosh tortgan edi. Sentabr oyida NBC telekanali ushbu qurollarni yetkazib berishga Pentagon qarshi chiqqani haqida xabar berdi. Rossiya agar ATACMS Ukrainaga yetkazilsa, Qo‘shma Shtatlar “qizil chiziq”dan o‘tib ketishi haqida ogohlantirgan. 4-oktabr kuni Oq uy Ukrainaga 625 million dollarlik yangi yordam paketini, jumladan to‘rtta HIMARS va ular uchun snaryadlar yetkazilishini e’lon qildi.
Eslatib o‘tamiz, G‘arb davlatlari Qrimning Rossiya tarkibiga kirishini tan olmaydi.
Izoh (0)