Ukraina ham shimoli-sharqiy, ham janubiy frontlardagi hujum operatsiyalarida muvaffaqiyatlarga erishishda davom etmoqda. Bu haqda Buyuk Britaniya Mudofaa vazirligi o‘z Twitter’ida ma’lum qildi.
Ma’lumotda aytilishicha, shimoli-sharqda, Xarkov viloyatida Ukraina Qurolli kuchlari Oskol daryosidan sharqdagi hududlarning katta qismini egallagan.
Ukraina harbiylari daryo ortida, Svatovo shahri ta’minot tuguni tomonda Rossiya mudofaa chizig‘iga 20 kilometrgacha siljigan.
“Katta ehtimol bilan endi Ukraina o‘z artilleriya tizimlaridan Svatovo—Kremennaya asosiy yo‘liga zarba berishi mumkin, bu esa Rossiyaning sharqdagi o‘z bo‘linmalarini to‘ldirish bo‘yicha imkoniyatlarini yanada cheklab qo‘yadi”, — deyiladi xabarda.
Britaniya idorasi fikricha, Rossiya rahbariyati 30-sentabr kuni bosib olingan Lugansk viloyati chegaralariga Ukraina ilg‘or bo‘linmalari yaqinlashayotganidan xavotirga tushgan bo‘lishi mumkin.
Avvalroq Ukraina harbiylari Rossiya qo‘shinlari tomonidan egallab olingan Xerson viloyatida yana sakkizta aholi punktini ozod qilgani haqida Ukraina prezidenti Vladimir Zelenskiy aytib o‘tgandi.
Shu hafta Xerson viloyatidan tashqari, Xarkov, Lugansk va Donetsk viloyatlaridagi shahar va qishloqlar ham “Rossiyaning soxta referendumidan ozod etildi”, dedi Zelenskiy. Uning so‘zlariga ko‘ra, gap ozod qilingan o‘nlab aholi punktlari haqida bormoqda.
Shuningdek, prezident ma’lum qilishicha, Ukraina armiyasi mamlakat janubida “ancha tez va shiddatli tarzda” olg‘a ketishda davom etmoqda.
4-oktabr kuni Ukraina prezidenti ofisi rahbari o‘rinbosari Kirill Timoshenko Donetsk, Lugansk, Nikolayev, Xarkov va Xerson viloyatlarida 1534 ta aholi punkti ozod etilib bo‘lganini ma’lum qildi. O‘z navbatida, Ukraina ichki ishlar vaziri o‘rinbosari Yevgeniy Yenin Xerson viloyatining o‘zida 50 ta aholi punkti ozod qilinganini aytdi.
Shu kuni Rossiya Mudofaa vazirligi Ukrainadagi jangovar harakatlar xaritasini namoyish qildi, unga ko‘ra, Xerson viloyatida front chizig‘i taxminan 30 kilometrga janubga siljigan.
Izoh (0)