Samarqand viloyati Urgut tumanidagi to‘yxonada ommaviy zaharlanish qayd etilgani haqida xabar berilgan edi. Shundan so‘ng Bosh prokuratura tergovga qadar tekshirish harakatlari olib borilayotganini bildirgan. Viloyat sanitariya-epidemiologik osoyishtalik va jamoat salomatligi boshqarmasi esa fuqarolarning ahvoli yuzasidan yangi ma’lumotlarni e’lon qildi.
Xabarga ko‘ra, 19-iyul kuni Urgut tumani “Jozmon” mahallasida joylashgan to‘yxonada “G‘ishtmachit” mahallasida yashovchi fuqaro to‘y o‘tkazgani, tadbirda 200 nafarga yaqin fuqaro ishtirok etib, ko‘pchiligi ovqatdan zaharlanganligi haqidagi xabar e’lon qilingan. Viloyat sanitariya-epidemiologik osoyishtalik va jamoat salomatligi boshqarmasi va Urgut tuman bo‘limi mutaxassislari tomonidan holatga aniqlik kiritish maqsadida o‘rganish ishlari olib borilgan.
O‘rganish davomida Urgut tuman “Jozmon” mahallasidagi Innovation Structural Stroy MCHJga qarashli “Burxon ota” to‘yxonasida o‘tkazilgan to‘y tadbirida qatnashganlardan 19-iyul kuni jami 33 nafar fuqaro bosh og‘rig‘i, ko‘ngil aynishi, qorin sohasida og‘riq, ich ketish, tana haroratining ko‘tarilishi kabi kasallik belgilari bilan tuman tibbiyot birlashmasiga qarashli yuqumli kasalliklar bo‘limiga murojaat qilgan.
Tibbiy ko‘rikda kasallikning klinik belgilari va epidemiologik anamneziga asoslanib, bemorlarga o‘tkir gastroenterit ovqat toksikoinfeksiyasi o‘rta og‘ir va yengil darajasi tashxisi qo‘yilgan. Epidemiologik tekshiruvga 20-iyul kuni soat 15:00 dan boshlab viloyat sanitariya-epidemiologik osoyishtalik va jamoat salomatligi boshqarmasi va Respublika san-epid xizmati mutaxassislari jalb etilgan.
Bemorlarga dastlabki tibbiy yordam ko‘rsatgan tibbiyot xodimlari bilan o‘tkazilgan so‘rab-surishtiruv va bemorlarning tibbiyot bayonnomalarini o‘rganish natijasiga ko‘ra, 19—20-iyul kunlari tibbiy yordamga murojaat qilgan jami 33 nafar fuqarodan 22 nafariga ambulator sharoitida tibbiy yordam ko‘rsatilgan va 19-iyul kuni uyiga javob berilgan.
Statsionar sharoitda davolanayotgan 11 nafar bemordan 9 nafariga 20-iyul kuni qoniqarli ahvolda uyiga javob berilgan. Bugungi kunda shifoxonada 2 nafar bemor davolanmoqda. Ularning ahvoli dinamikada stabil, dezintoksikatsion va simptomatik davo muolajalari davom ettirilmoqda. Murojaat qilgan barcha bemorlarga malakali tibbiy yordam ko‘rsatilgan, ya’ni oshqozoni yuvilgan va tozalovchi xuqna qilingan.
Ambulator sharoitda tibbiy yordam ko‘rsatilgan barcha bemorlar bilan zaharlanish sabablarini o‘rganish borasida o‘tkazilgan so‘rov-surishtiruvda ular o‘z kasalliklari boshlanishini “Burhon ota” to‘yxonasida o‘tkazilgan to‘y tadbirida iste’mol qilgan uy sharoitida tayyorlangan mayonezli salatlar bilan bog‘lagani aniqlangan.
To‘y tadbirida jami 250 nafardan ziyod fuqaro ishtirok etgan bo‘lib, 199 nafarining ro‘yxati shakllantirilgan va tibbiy ko‘rikdan o‘tkazilgan. Tibbiy ko‘rikda ulardan 23 nafarida kasallikning ayrim alomatlari mavjudligi aniqlanib, tuman tez yordam bo‘limining “G‘isht masjid” bo‘limida ambulator sharoitda davolanib, 19-iyul kuni qoniqarli ahvolda uyiga javob berilgan.
Qayd etilgan holat bo‘yicha Innovation Structural Stroy MCHJga qarashli “Burhon ota” to‘yxonasida vakolatli organning kelishuvi tartibida tekshiruv o‘tkazilishi yuzasidan belgilangan tartibda buyurtma berish uchun hozirda hujjatlar rasmiylashtirilmoqda.
Izoh (0)