Самарқандда оммавий заҳарланган фуқаролар аҳволи қандайлиги айтилди

Самарқанд вилояти Ургут туманидаги тўйхонада оммавий заҳарланиш қайд этилгани ҳақида хабар берилган эди. Шундан сўнг Бош прокуратура терговга қадар текшириш ҳаракатлари олиб борилаётганини билдирган. Вилоят санитария-эпидемиологик осойишталик ва жамоат саломатлиги бошқармаси эса фуқароларнинг аҳволи юзасидан янги маълумотларни эълон қилди.

Хабарга кўра, 19 июль куни Ургут тумани «Жозмон» маҳалласида жойлашган тўйхонада «Ғиштмачит» маҳалласида яшовчи фуқаро тўй ўтказгани, тадбирда 200 нафарга яқин фуқаро иштирок этиб, кўпчилиги овқатдан заҳарланганлиги ҳақидаги хабар эълон қилинган. Вилоят санитария-эпидемиологик осойишталик ва жамоат саломатлиги бошқармаси ва Ургут туман бўлими мутахассислари томонидан ҳолатга аниқлик киритиш мақсадида ўрганиш ишлари олиб борилган.

Ўрганиш давомида Ургут туман «Жозмон» маҳалласидаги Innovation Structural Stroy МЧЖга қарашли «Бурхон ота» тўйхонасида ўтказилган тўй тадбирида қатнашганлардан 19 июль куни жами 33 нафар фуқаро бош оғриғи, кўнгил айниши, қорин соҳасида оғриқ, ич кетиш, тана ҳароратининг кўтарилиши каби касаллик белгилари билан туман тиббиёт бирлашмасига қарашли юқумли касалликлар бўлимига мурожаат қилган.

Тиббий кўрикда касалликнинг клиник белгилари ва эпидемиологик анамнезига асосланиб, беморларга ўткир гастроэнтерит овқат токсикоинфекцияси ўрта оғир ва енгил даражаси ташхиси қўйилган. Эпидемиологик текширувга 20 июль куни соат 15:00 дан бошлаб вилоят санитария-эпидемиологик осойишталик ва жамоат саломатлиги бошқармаси ва Республика сан-эпид хизмати мутахассислари жалб этилган.

Беморларга дастлабки тиббий ёрдам кўрсатган тиббиёт ходимлари билан ўтказилган сўраб-суриштирув ва беморларнинг тиббиёт баённомаларини ўрганиш натижасига кўра, 19—20 июль кунлари тиббий ёрдамга мурожаат қилган жами 33 нафар фуқародан 22 нафарига амбулатор шароитида тиббий ёрдам кўрсатилган ва 19 июль куни уйига жавоб берилган.

Стационар шароитда даволанаётган 11 нафар бемордан 9 нафарига 20 июль куни қониқарли аҳволда уйига жавоб берилган. Бугунги кунда шифохонада 2 нафар бемор даволанмоқда. Уларнинг аҳволи динамикада стабил, дезинтоксикацион ва симптоматик даво муолажалари давом эттирилмоқда. Мурожаат қилган барча беморларга малакали тиббий ёрдам кўрсатилган, яъни ошқозони ювилган ва тозаловчи хуқна қилинган.

Амбулатор шароитда тиббий ёрдам кўрсатилган барча беморлар билан заҳарланиш сабабларини ўрганиш борасида ўтказилган сўров-суриштирувда улар ўз касалликлари бошланишини «Бурҳон ота» тўйхонасида ўтказилган тўй тадбирида истеъмол қилган уй шароитида тайёрланган майонезли салатлар билан боғлагани аниқланган.

Тўй тадбирида жами 250 нафардан зиёд фуқаро иштирок этган бўлиб, 199 нафарининг рўйхати шакллантирилган ва тиббий кўрикдан ўтказилган. Тиббий кўрикда улардан 23 нафарида касалликнинг айрим аломатлари мавжудлиги аниқланиб, туман тез ёрдам бўлимининг «Ғишт масжид» бўлимида амбулатор шароитда даволаниб, 19 июль куни қониқарли аҳволда уйига жавоб берилган.

Қайд этилган ҳолат бўйича Innovation Structural Stroy МЧЖга қарашли «Бурҳон ота» тўйхонасида ваколатли органнинг келишуви тартибида текширув ўтказилиши юзасидан белгиланган тартибда буюртма бериш учун ҳозирда ҳужжатлар расмийлаштирилмоқда.