Avstraliya va Niderlandiya sakkiz yil avval Donbassda urib tushirilgan Malaysian Airlines aviakompaniyasining MH17 reysi bo‘yicha Xalqaro fuqaro aviatsiyasi tashkilotida Rossiyaga qarshi qo‘shma da’vo qo‘zg‘atganini ma’lum qildi, deb yozmoqda Reuters.
Avstraliya bosh vaziri Skott Morrison va tashqi ishlar vaziri Maris Peynning aytishicha, urib tushirilgan reys uchun xalqaro huquq doirasida Rossiya javobgar, BMT Aviatsiya kengashiga murojaat esa 298 nafar qurbon haqiga adolat uchun kurashda muhim qadam bo‘ldi.
“Rossiyaning Ukrainaga asossiz bostirib kirishi va tajovuzkorligining kuchayishi Rossiyani xalqaro huquq hamda BMT nizomini qo‘pol ravishda buzgani, jumladan, Ukraina suvereniteti va havo hududiga tahdidlar uchun javobgarlikka tortish bo‘yicha davom etayotgan sa’y-harakatlarimizni davom ettirish zarurligidan dalolatdir”, — dedi siyosatchilar bayonotida.
Avstraliya rasmiylari bu voqea Fuqarolik samolyotlarini o‘t ochishlardan himoya qilish bo‘yicha konvensiyani ochiqdan-ochiq buzganini aytdi. Niderlandiya hukumatining bayonotida ta’kidlanishicha, ushbu qadamdan BMT Xavfsizlik kengashi ham xabardor qilingan.
“298 nafar tinch aholi, jumladan, 196 niderlandiyalikning o‘limi oqibatlarsiz qolishi mumkin emas. Ukrainadagi hozirgi voqealar buning hayotiy ahamiyatini ko‘rsatmoqda”, — dedi Niderlandiya tashqi ishlar vaziri Vopke Xekstra.
Avstraliya yetkazilgan zarar uchun Rossiyadan tovon undirilishini, shuningdek, fuqarolik havo qatnovi standartlarini belgilovchi aviatsiya kengashida Rossiyaning ovoz berish huquqini to‘xtatib turishni talab qilgan
Eslatib o‘tamiz, 2014-yil 17-iyul kuni Amsterdamdan Kuala-Lumpurga yo‘l olgan Malaysian Airlines layneri urib tushirilgan, uning bortida o‘nta davlat fuqarolaridan iborat 300 ga yaqin odam bo‘lgan. O‘sha paytda janglar ketayotgan Donbass osmonida qulagan samolyot yo‘lovchilarining barchasi halok bo‘lgan. Laynerni kim urib tushirgani haligacha noma’lum.
Kiyev fojiada jangarilarni aybladi. Ular esa bunday balandlikdagi samolyotni urib tushirishga qodir vositalari yo‘qligini aytgan. Xalqaro tergov guruhi hisobotida aytilishicha, Boeing samolyotiga zarba bergan “Buk” havo mudofaa tizimi Rossiyadan olib kelingan va keyin ortga qaytarilgan. Moskva tergovning noxolisligi, uning xulosalari faqat Ukrainada ma’lumotlarga asoslangani haqida bir necha bor ta’kidlagan.
Izoh (0)