Kiyevda 15-mart soat 20:00 dan (Toshkent vaqti bilan 23:00) 17-mart 07:00 gacha kuchaytirilgan komendantlik soati amal qiladi. Bu haqda shahar meri Vitaliy Klichko ma’lum qildi.
“Bugun qiyin va xavfli davr... Shahar bo‘ylab maxsus ruxsatnomalarsiz harakatlanish taqiqlanadi. Faqat boshpanaga yetib olish uchun tashqariga chiqishingiz mumkin”, — deb yozdi Klichko o‘zining Telegram kanalida.
U kuchaytirilgan komendantlik soati nima sababdan joriy etilgani haqida batafsil ma’lumot bermadi.
Kiyevda komendantlik soati 24-fevralda, Rossiyaning Ukrainaga bosqinining birinchi kunida joriy qilingan edi. Kuchaytirilgan komendantlik soati esa 26-fevraldan 28-fevralgacha amal qilgan. Undan biroz oldin Ukraina prezidenti Vladimir Zelenskiy Kiyevga rus qo‘shinlarining hujumi kutilayotganini aytgan. Biroq o‘sha paytda keng ko‘lamli hujum bo‘lmagan.
10-mart kuni Vitaliy Klichko har ikkinchi fuqaro Kiyevni tark etganini aytdi. Merning so‘zlariga ko‘ra, shaharda ikki milliondan sal kamroq aholi qolgan.
14-mart kuni Rossiya kuchlari Ukrainaning Xerson viloyatini to‘liq nazoratga olgani ma’lum qilindi.
Mavzuga doir:
- Urushning 19-kuni: Donetsk markazida raketa portlab, odamlar halok bo‘ldi. Rossiya “Birinchi kanal”i xodimi jonli efirda urushga qarshi norozilik bildirdi (foto va video)
- Rossiya Mudofaa vazirligi Ukrainada 180 nafar xorijlik yollanma askar o‘ldirilganini ma’lum qildi. Kiyev bu “haqiqiy Rossiya propagandasi” demoqda
- Zelenskiy barcha ukrainaliklarga quroldan foydalanishga ruxsat beruvchi qonunni imzoladi
Izoh (0)