Австралия ва Нидерландия 8 йил аввал Донбассда уриб туширилган MH17 рейси бўйича Россияга қарши даъво қўзғатди

Австралия ва Нидерландия саккиз йил аввал Донбассда уриб туширилган Malaysian Airlines авиакомпаниясининг MH17 рейси бўйича Халқаро фуқаро авиацияси ташкилотида Россияга қарши қўшма даъво қўзғатганини маълум қилди, деб ёзмоқда Reuters.

Австралия бош вазири Скотт Моррисон ва ташқи ишлар вазири Марис Пейннинг айтишича, уриб туширилган рейс учун халқаро ҳуқуқ доирасида Россия жавобгар, БМТ Авиация кенгашига мурожаат эса 298 нафар қурбон ҳақига адолат учун курашда муҳим қадам бўлди.

«Россиянинг Украинага асоссиз бостириб кириши ва тажовузкорлигининг кучайиши Россияни халқаро ҳуқуқ ҳамда БМТ низомини қўпол равишда бузгани, жумладан, Украина суверенитети ва ҳаво ҳудудига таҳдидлар учун жавобгарликка тортиш бўйича давом этаётган саъй-ҳаракатларимизни давом эттириш зарурлигидан далолатдир», — деди сиёсатчилар баёнотида.

Австралия расмийлари бу воқеа Фуқаролик самолётларини ўт очишлардан ҳимоя қилиш бўйича конвенцияни очиқдан-очиқ бузганини айтди. Нидерландия ҳукуматининг баёнотида таъкидланишича, ушбу қадамдан БМТ Хавфсизлик кенгаши ҳам хабардор қилинган.

«298 нафар тинч аҳоли, жумладан, 196 нидерландияликнинг ўлими оқибатларсиз қолиши мумкин эмас. Украинадаги ҳозирги воқеалар бунинг ҳаётий аҳамиятини кўрсатмоқда», — деди Нидерландия ташқи ишлар вазири Вопке Хекстра.

Австралия етказилган зарар учун Россиядан товон ундирилишини, шунингдек, фуқаролик ҳаво қатнови стандартларини белгиловчи авиация кенгашида Россиянинг овоз бериш ҳуқуқини тўхтатиб туришни талаб қилган

Эслатиб ўтамиз, 2014 йил 17 июль куни Амстердамдан Куала-Лумпурга йўл олган Малайсиан Airlines лайнери уриб туширилган, унинг бортида ўнта давлат фуқароларидан иборат 300 га яқин одам бўлган. Ўша пайтда жанглар кетаётган Донбасс осмонида қулаган самолёт йўловчиларининг барчаси ҳалок бўлган. Лайнерни ким уриб туширгани ҳалигача номаълум.