“Tolibon” tomonidan shakllantirilgan Afg‘oniston hukumati Qirg‘izistondan afg‘on qishloq xo‘jaligi mahsulotlarini Rossiya bozoriga eksport qilishda yordam so‘radi. Bu boradagi tegishli bayonot “Tolibon” tashqi ishlar vaziri Amirxon Muttaqiy Qirg‘iziston tashqi ishlar vaziri Ruslan Qozoqboyev bilan Antaliyada o‘tkazilgan diplomatik forum doirasida e’lon qilingan, deb xabar beradi Qirg‘iziston TIV matbuot xizmati.
Qozoqboyev mintaqa davlatlari o‘rtasidagi transport-tranzit salohiyatidan to‘liqroq foydalanishga chaqirgan.
“Afg‘on tomoni qit’aning shimoli va janubini bog‘lovchi savdo yo‘llarini yo‘lga qo‘yishni taklif qildi hamda Afg‘onistondan qishloq xo‘jaligi mahsulotlarini Rossiya bozoriga olib chiqishda Qirg‘izistonning manfaatdorlik va tranzit imkoniyatlarini hisobga olgan holda ko‘maklashish so‘rovini bildirdi”, — deyiladi matbuot xizmati xabarida.
Qirg‘iziston Tashqi ishlar vazirligi rahbari, shuningdek, CASA-1000 mintaqaviy energetika loyihasini amalga oshirishni davom ettirishga ham e’tibor qaratgan.
“Tolibon”, o‘z navbatida, Markaziy Osiyo va Afg‘oniston o‘rtasidagi hamkorlikni mustahkamlash masalalarini ko‘rib chiqish va Kobulda xavfsizlik masalalari bo‘yicha konferensiya o‘tkazishni taklif qilgan.
Bundan tashqari, Muttaqiy Badaxshonni “mahalliy aholi, jumladan, Afg‘onistonning Katta va Kichik Pomirlarida yashovchi etnik qirg‘izlar manfaati uchun kasalxonalar va maktablar qurish orqali” birgalikda rivojlantirish loyihasini taklif qilgan.
Bundan oldin Afg‘onistondagi barcha davlat universitetlari yigit-qizlar uchun qayta ochilgani, Afg‘onistonda gumanitar yordamga muhtoj bolalar soni 13 milliondan oshib ketgani to‘g‘risida xabar berilgandi.
Izoh (0)