Bloomberg Rossiyaning defolt bo‘lishi mumkin bo‘lgan uchta ssenariysini tahlil qildi

Rossiya hukumati 16-mart, chorshanba kuni 117 mln dollarlik obligatsiyalar bo‘yicha foizlarni to‘lashi kerak. O‘sha kungi to‘lovlar Rossiyaning xorijiy valyutadagi defoltiga olib kelishi mumkin. Bu haqda Bloomberg xabar bermoqda.

Bloomberg voqealar rivojining uchta ehtimoliy ssenariysini keltirib o‘tgan. Birinchidan, Rossiya dollar obligatsiyalari bo‘yicha foizlarni dollarda to‘lashi kerak. Bu qarz inqirozini vaqtincha oldini olishga imkon beradi. Investorlar 4-aprelda muddati tugaydigan dollar obligatsiyalari bo‘yicha to‘lovlarni kutishmoqda.

Ikkinchi ssenariyda Rossiya rubldagi obligatsiyalarini qaytarib olishi mumkin. Ba’zi obligatsiya shartnomalarida bu variant ko‘zda tutilgan. Biroq 16-mart kuni to‘lanishi kerak bo‘lgan obligatsiyalar bilan bunaqa emas.

Bloomberg keltirgan uchinchi ssenariyga ko‘ra, Rossiya qarzlarni umuman to‘lamaydi. Bunday holda, Rossiyada 15-aprelgacha vaziyatni to‘g‘rilash uchun 30 kunlik imtiyozli davr bo‘ladi, aks holda klassik og‘ir defolt yuzaga keladi: Rossiya moliyalashtirishga kirishdan bloklanadi, investorlar mablag‘larini yo‘qotadi.

Rossiya Moliya vazirligi 16-mart kuni 117,2 mln dollarlik obligatsiyalarni to‘lash bo‘yicha topshiriq bergan, biroq pul qaysi valyutada to‘lanishini ko‘rsatilmagan. 14-mart kuni Moliya vazirligi tomonidan xorijiy valyutadagi davlat qarzlarini to‘lashning vaqtinchalik tartibi tasdiqlandi. Bundan kelib chiqadiki, agar xorijiy banklar Rossiyaning xalqaro zaxiralari muzlatilganligi sababli ushbu to‘lovni amalga oshira olmasa, yevroobligatsiyalar bo‘yicha to‘lovlar rublda amalga oshiriladi.

Kremlning fikricha, Rossiyada hech qanday defolt xavfi yo‘q. 

Biz barcha tashqi qarzlarni rublda to‘lash uchun zarur xavfsizlik choralarini ko‘rganmiz. Aslida, defolt uchun hech qanday xavf yo‘q, agar ular sun;iy ravishda bizga qarshi yaratilmasa, — deydi Rossiya prezidentining matbuot kotibi Dmitriy Peskov.