Otabek Fozilkarimov sog‘liqni saqlash vazirining o‘rinbosari lavozimiga tayinlandi, deb xabar beradi Telegram’dagi “Nigoh” kanali.
Otabek Fozilkarimov 2020-yilning noyabridan beri Moliya vazirligi Sog‘liqni saqlash va sport sohalarida budjet siyosati departamenti direktori lavozimida ishlab kelayotgandi.
Ma’lumot uchun, u mehnat faoliyatini 2007-yili Moliya vazirligining Ijtimoiy soha va fanni moliyalashtirish bosh boshqarmasi fanni moliyalashtirish bo‘limi 1-toifali iqtisodchisi sifatida boshlagan. 2008–2011-yillarda Moliya vazirligi Ijtimoiy soha va fanni moliyalashtirish bosh boshqarmasi sog‘liqni saqlashni va ijtimoiy himoyani moliyalashtirish bo‘limi 1-toifali iqtisodchisi bo‘lgan.
2011–2020-yillar davomida Moliya vazirligi Ijtimoiy soha va fanni moliyalashtirish bosh boshqarmasi sog‘liqni saqlashni va ijtimoiy himoyani moliyalashtirish bo‘limi bosh iqtisodchisi, bo‘limi boshlig‘i, Aholini ijtimoiy himoya qilish va sog‘liqni saqlash tarmoqlarida budjet siyosati boshqarmasi boshlig‘i sifatida ishlagan.
Eslatib o‘tamiz, yanvar oxirlarida 2020-yilning iyulidan beri sog‘liqni saqlash vazirining o‘rinbosari lavozimida ishlab kelgan Abdulla Azizov OKMK boshqaruv raisi o‘rinbosari etib tayinlangandi.
2021-yilning noyabrida O‘zbekiston prezidentining tegishli farmoni bilan bosh vazir o‘rinbosari lavozimida ishlab kelgan Behzod Musayev sog‘liqni saqlash vaziri etib tayinlangandi. Avvalroq prezident Shavkat Mirziyoyev yig‘ilishda sog‘liqni saqlash tizimi haqida gapirar ekan, vazir Behzod Musayevga, eng avvalo, pastga tushib ishlash kerakligini ta’kidlagan edi. “Endi sen ham buni eplolmasang, O‘zbekistonda tibbiyotni hech kim eplolmaydi, yopish kerak vazirlikni”, — degandi davlat rahbari Behzod Musayevga qarata.
Izoh (0)