O‘zbekistonda endi istalgan avtomobil tarixiga oid ma’lumotlarni olish mumkin bo‘ladi

Hukumat qarori bilan “Avtomobil tarixi” ma’lumotlarini taqdim etish bo‘yicha davlat xizmatini ko‘rsatishning ma’muriy reglamenti tasdiqlandi. Bu haqda Telegram’dagi “Huquqiy axborot” kanali xabar qildi.

Qarorga ko‘ra, 2022-yil 1-maydan “Avtomobil tarixi” ma’lumotlarini shartnomaviy asosda DXM, YIDXP (my.gov.uz) yoki veb-saytlar va ularning ilovalari orqali aniqlash bo‘yicha davlat xizmati yo‘lga qo‘yiladi. Avtotransportni texnik ko‘rikdan o‘tkazish jarayonida avtotransportning bosib o‘tgan masofasi haqidagi ma’lumotlar, jumladan, texnik ko‘rikdan o‘tkazuvchi tadbirkorlar tomonidan ham majburiy tartibda axborot tizimiga kiritiladi.

“Avtomobil tarixi” ma’lumotlari quyidagilarni o‘z ichiga oladi:

• avtotransportning agregat ma’lumotlari;
• bosib o‘tgan masofasi;
• shartnoma tuzilganiga oid ma’lumotlar (ishonchnoma, ijara, hadya);
• yo‘l-transport hodisasi sodir etilgani;
• qoidabuzarliklar holati;
• garovga qo‘yilganlik holati;
• taqiq borligi yoki yo‘qligi;
• bojxona rasmiylashtiruviga oid ma’lumot;
• litsenziya olinganlik holati (yo‘lovchi tashish uchun).

Ma’lumotnoma axborot xususiyatiga ega hujjat hisoblanadi. Ariza beruvchilar O‘zbekistonda ro‘yxatdan o'tgan istalgan avtomobil haqida ma’lumot olishi mumkin.

Avvalroq Normativ-huquqiy hujjatlar loyihalari muhokamasi portalida Davlat xizmatlari agentligi tomonidan ishlab chiqilgan “Avtomobil tarixi” ma’lumotlarini taqdim etish bo‘yicha davlat xizmatini ko‘rsatishning ma’muriy reglamentini tasdiqlash to‘g‘risida”gi hukumat qarori loyihasi e’lon qilingandi. Berilayotgan ma’lumotlar axborot xarakteriga ega bo‘lib, kelgusida rasmiy harakatlarni amalga oshirish uchun asos bo‘lmaydi. Shaxsga doir ma’lumotlarning kafolatlanishini ta’minlash maqsadida ma’lumotlarda mulk egasi haqidagi shaxsiy ma’lumotlar, shuningdek, tezkor-qidiruv, mudofaa va xavfsizlikka oid avtotransport vositalariga oid ma’lumotlar aks ettirilmaydi.