2021-yil dekabr oyida bo‘lib o‘tgan Strategik sheriklik muloqotining ilk uchrashuvi yakunlari bo‘yicha erishilgan kelishuvlarga muvofiq, 6-9-mart kunlari O‘zbekiston tashqi ishlar vaziri Abdulaziz Komilov boshchiligidagi delegatsiya AQShga tashrif buyurdi. Bu haqda TIV matbuot xizmati xabar berdi.
Ma’lum qilinishicha, O‘zbekiston Tashqi ishlar vazirligi rahbari Vashingtonga tashrifi doirasida AQSh Davlat kotibi Entoni Blinken bilan muzokaralar o‘tkazgan. Suhbat chog‘ida O‘zbekiston va AQSh o‘rtasida diplomatik munosabatlar o‘rnatilganining 30 yilligi hamda strategik sheriklik munosabatlarining 20 yilligi munosabati bilan o‘zaro tabriklar almashilgan. Abdulaziz Komilov va Entoni Blinken O‘zbekiston—AQSh munosabatlarining bugungi holati va istiqbollari, mintaqaviy xavfsizlik va barqarorlikni ta’minlashning dolzarb masalalari, jumladan, qo‘shni Afg‘onistondagi gumanitar vaziyatni ham muhokama qilgan. C5+1 shakli doirasida mintaqaviy hamkorlikning amaliy jihatlariga alohida e’tibor qaratilgan.
“Bugun tashqi ishlar vaziri Komilov bilan yaxshi uchrashuv bo‘ldi. O‘zbekistonga Ukraina va Afg‘onistonga ko‘rsatayotgan insonparvarlik yordami uchun minnatdorchilik bildirib, O‘zbekistonning islohotlar dasturini, uning hududiy yaxlitligi, suvereniteti va mustaqilligini qo‘llab-quvvatlashimizni yana bir bor tasdiqladim”, — deb yozadi Blinken o‘zining Twitter’dagi sahifasiga.
Shuningdek, O‘zbekiston delegatsiyasi Amerikada bo‘lishi davomida AQSh administratsiyasi vakillari, Kongress a’zolari, Amerika ishbilarmon va ilmiy doiralari vakillari bilan ham uchrashuv hamda muzokaralar o‘tkazgan.
Amerika—O‘zbekiston Savdo palatasi a’zolari bilan uchrashuvda O‘zbekiston tomoni Amerika ishbilarmon doiralari vakillariga 2022-2026-yillarda Yangi O‘zbekistonni rivojlantirish strategiyasining asosiy qoidalari, respublikada iqtisodiyotni tubdan isloh qilish bo‘yicha ko‘rilayotgan chora-tadbirlar bilan tanishtirgan. Tadbir davomida AQSh kompaniyalarining respublikadagi islohotlar jarayonlarida ishtirokini kengaytirish masalalari ham muhokama qilingan.
“Bundan tashqari, 24-26-mart kunlari bo‘lib o‘tgan birinchi Toshkent xalqaro investitsiya forumi (TXIF) ishida Amerika kompaniyalarining keng ishtiroki bo‘yicha kelishuvga erishildi”, — deyiladi xabarda.
Xalqaro ta’lim bo‘yicha Amerika kengashi, Jorj Vashington universiteti, Texas A&M universiteti, Kaliforniyadagi Berkli universiteti rahbariyati va ekspertlari bilan muloqotlar uyushtirilgan. Uchrashuvlarda mahalliy mutaxassislar salohiyatini mustahkamlash maqsadida ikki davlat o‘rtasida universitetlararo hamkorlikni kengaytirish, akademik va ilmiy almashinuvlarni tashkil etish imkoniyatlari muhokama qilingan.
Eslatib o‘tamiz, 2021-yilning 27-iyun kuni O‘zbekiston tashqi ishlar vaziri Abdulaziz Komilov boshchiligidagi delegatsiya amaliy tashrif bilan AQShga borgandi. 28-iyun kuni Abdulaziz Komilov AQSh Xalqaro taraqqiyot agentligi (USAID) administratori Samanta Pauer bilan uchrashgan edi. 1-iyul kuni esa Vashingtonda AQSh davlat kotibi Entoni Blinken Komilov bilan uchrashgan. O‘shanda davlat kotibi AQShning O‘zbekiston bilan strategik sherikligini chuqurlashtirish istagini bildirgan va bu yil ikki mamlakat diplomatik munosabatlarining 30 yilligi nishonlanishini ta’kidlagandi.
Izoh (0)