Sog‘liqni saqlash vaziriga 4 nafar o‘rinbosar tayinlandi. Elmira Bositxonova yana vazirlik tizimiga qaytdi

Prezidentning 2020-yil 3-iyuldagi tegishli qarorlariga asosan, sog‘liqni saqlash vazirining o‘rinbosarlari lavozimiga Elmira Bositxonova, Ulug‘bek Sobirov, Shohrux Shorahmetov hamda Abdulla Azizov tayinlangan. Bu haqda Sog‘liqni saqlash vazirligi Jamoatchilik bilan aloqalar bo‘limi xabar qildi.

Elmira Bositxonova 1958-yilda tug‘ilgan. 1981-yilda Toshkent davlat tibbiyot instituti (hozirgi Toshkent tibbiyot akademiyasi)ni tamomlagan, tibbiyot fanlari doktori.

Toshkent shahar tez tibbiy yordam klinik shifoxonasida faoliyatini boshlagan va ko‘p yillar bosh shifokor sifatida, shuningdek, O‘zbekiston Respublikasi bosh vaziri o‘rinbosari, Xotin-qizlar qo‘mitasi raisi, so‘ng sog‘liqni saqlash vaziri o‘rinbosari lavozimlarida faoliyat ko‘rsatgan. Ayni paytga qadar mahalla va oilani qo‘llab-quvvatlash vazirining birinchi o‘rinbosari lavozimida faoliyat yuritib kelayotgandi.

Ulug‘bek Sobirov 1974-yilda tug‘ilgan. 1997-yilda Toshkent davlat ikkinchi tibbiyot instituti (hozirgi Toshkent tibbiyot akademiyasi)ning davolash ishi mutaxassisligi bo‘yicha tamomlagan, tibbiyot fanlari doktori.

Dermatologiya va venerologiya ilmiy tekshirish institutida turli lavozimlarda ishlagan. 2013-yildan ayni paytga qadar Respublika ixtisoslashtirilgan dermatologiya va kosmetologiya ilmiy-amaliy tibbiyot markazi direktori lavozimida samarali faoliyat yuritib kelayotgandi.

Shohrux Shorahmetov boshqa ishga o‘tgan Bahodir Nizomov o‘rnini egallagan.

U 1977-yilda tug‘ilgan. 1998-yilda Toshkent davlat iqtisodiyot universitetini, 1999-yilda esa Buyuk Britaniyaning Ekseter universitetini iqtisodchi, moliya va investitsiyalar mutaxassisligi bo‘yicha tamomlagan.

Tayinlovga qadar moliya vaziri o‘rinbosari lavozimida faoliyat ko‘rsatib kelayotgandi.

Abdulla Azizov 1981-yilda tug‘ilgan. 2003-yilda Yaponiyaning Nagoya universitetini, 2004-yilda Jahon iqtisodiyoti va diplomatiya universitetini tamomlab, moliya va xalqaro biznes yo‘nalishi bo‘yicha magistr darajasini olgan.

Shuningdek, Daniyaning Orxus universiteti magistraturasini, Orxus texnika kollejini IT-dasturchi mutaxassisligi bo‘yicha tamomlab, ushbu yo‘nalishda faoliyatini boshlagan.

Tayinlovga qadar, 2006—2019-yillarda Daniyada qator nufuzli kompaniyalarda mas’ul lavozimlarda ishlagan. 2019-yil sentabr oyidan ayni paytga qadar O‘zbekiston Respublikasi Davlat soliq qo‘mitasi raisi o‘rinbosari lavozimida samarali faoliyat yuritib kelayotgandi.