O‘zbekistonda aholi va hududlarni favqulodda vaziyatlardan muhofaza qilishga oid qonun yangi tahrirda qabul qilinadi

Oliy Majlis Qonunchilik palatasida “Aholini va hududlarni tabiiy hamda texnogen xususiyatli favqulodda vaziyatlardan muhofaza qilish to‘g‘risida”gi qonun yangi tahrirda ko‘rib chiqilmoqda, deb xabar beradi deputat Rasul Kusherbayev.

Ta’kidlanishicha, 2020-yilning 27-aprel kuni Buxoroning Olot, Qorako‘l, Jondor tumanlarida kuzatilgan tabiiy ofat hamda 1-may kuni Sardoba suv omborida yuzaga kelgan texnogen oqibatlarini bartaraf etishda favqulodda vaziyatlarning oldini olish va bunda harakat qilish davlat tizimi faoliyatini muvofiqlashtirish, oqibatlarini bartaraf etishni tashkil etishda kamchiliklar kuzatilgan.

“Bu aholi va hududlarni favqulodda vaziyatlardan muhofaza qilish sohasida, shu jumladan, favqulodda vaziyatlarni bartaraf etishda hamkorlik qilishning huquqiy asoslarini takomillashtirishni taqozo etmoqda… Loyiha deputatlar tomonidan birinchi o‘qishda qabul qilindi”, — deb yozadi deputat.

Eslatib o‘tamiz, 2020-yilning 27-aprelida O‘zbekistonga Turkmaniston hududidan kirib kelgan kuchli shamol oqibatida Buxoroda bir kishi halok bo‘lgan, 41 kishi jarohatlangan edi. Kuchli shamoldan so‘ng Buxoro, Navoiy, Sirdaryo va Samarqanddagi salkam 140 ming xonadon gazsiz qolgan. Buxoro kuchli shamoldan so‘ng elektr ta’minotida eng katta talafot ko‘rgandi.

Prezident Shavkat Mirziyoyev Buxoroda yuz bergan kuchli shamol oqibatlarini ko‘zdan kechirish uchun viloyatga tashrif buyurgan hamda Olot va Qorako‘lda tabiiy ofat oqibatlarini ko‘zdan kechirgandi.

Buxoroda 27-aprel shamolidan so‘ng Qorako‘l va Olot tumanlari bilan aloqa uzilib qolganidan keyin Qorako‘l va Olotda toshqin haqida asossiz mish-mish tarqalgan va tuman aholisi 28-aprel kuni o‘z xonadonlarini tark eta boshladi. Ijtimoiy tarmoqlarda traktor tirkamasida Buxoro shahri tomon ketayotgan qorako‘lliklar videosi ham paydo bo‘lgan. Keyinroq suv toshqini haqida yolg‘on xabar tarqatgan shaxslar aniqlangan edi. Buxoro viloyatida kuchli shamol yetkazgan jami zarar 141,6 mlrd so‘mni tashkil etgandi.

Sardoba suv omborining hozirgi holati va yuzaga kelgan texnogen ofatning sabablarini o‘rganish uchun Moskva davlat qurilish universiteti mutaxassislari jalb qilingandi. Qurilish vaziri Botir Zokirov 1-mart kuni Moskvadan kelgan ushbu mutaxassislarga 124 ming dollar to‘lanishi belgilanganini aytgandi. 2021-yilning mayida “Sardoba ishi”da aybdor deb topilgan 17 kishiga sud hukmi o‘qilgan.