Buxoro viloyatining Olot va Qorako‘l tumanlarini suv bosadi, deya yolg‘on uydirma tarqatib, odamlar o‘rtasida vahima uyg‘otgan shaxslar aniqlandi. Bu haqda “Daryo”ga Buxoro viloyat IIB axborot xizmati rahbari Quvvat Yarashov ma’lum qildi.

Buxoroda joriy yilning 27-aprelida kuchli shamol oqibatida sodir bo‘lgan tabiiy ofatdan so‘ng 28-aprelda “Qorako‘l va Olot tumanini suv bosadi” degan norasmiy xabar ijtimoiy tarmoqlarda tarqalib, odamlar orasida kuchli vahima uyg‘otdi.

Ma’lum qilinishicha, buning natijasida aholining katta qismi oila a’zolari bilan birgalikda yashash manzillarini tark etib, turli avtotransport vositalari orqali Jondor tumani hamda Buxoro shahri hududiga o‘tib ketishga harakat qilgan. Yo‘llarda juda katta tirbandlik va tartibsizlik holati yuzaga kelgan.

Holatga oydinlik kiritish maqsadida Olot va Qorako‘l tumanlarida huquq-tartibot idoralari xodimlari tomonidan olib borilgan surishtiruv ishlari davomida aholi orasida vahima uyg‘otgan shaxslar aniqlangan.

“Aynan 28-aprel kuni Qorako‘l va Olot tumanlarida sodir bo‘lgan tabiiy ofat tufayli telefon aloqasining ham bir muddat ishlamay qolgani yolg‘on xabar tarqatuvchi shaxslarni o‘sha soatlarning o‘zida aniqlash imkonini bermadi. Biroq tezkor guruh sa’y-harakati bilan bunday asossiz va vahimali xabar tarqatganlar 4 kishi ekanligi aniqlandi. Bular Qorako‘l tumanining ‘Quvacha’ mahallasi fuqarosi, 51 yoshli Murot Rahmatov va 25 yoshli Otamurod Mattiyev, shu tumanning ‘Yangibozor’ mahallasida yashovchi 43 yoshli Rahimjon Norboyev hamda Olot tumanidagi ‘Jayhunobod’ mahallasi fuqarosi 42 yoshli Umar Nazarov bo‘lgan. Ular Turkmanistondan oqib o‘tuvchi ‘Turkrmanobod’ kanalidan suv toshqini ko‘tarilib, Qorako‘l va Olot tumani hududini suv bosishi mumkinligi to‘g‘risidagi yolg‘on uydirmalarni qo‘ni-qo‘shnilari va mahalladoshlariga tarqatib, aholi orasida vahima uyg‘onishiga sababchi bo‘lgan”, — dedi “Daryo” muxbiriga Quvvat Yarashov.

Huquq-tartibot idoralari tomonidan olib borilgan surishtiruv ishlari jarayonida bu shaxslar o‘zlari orqali tarqatilgan asoslanmagan xabar oqibatida xalq orasida vahima uyg‘onishiga sababchi bo‘lganini tan olgan hamda xalqdan kechirim so‘rab, videomurojaat taqdim qilgan. Ularga nisbatan O‘zbekiston Respublikasi Ma’muriy javobgarlik to‘g‘risidagi kodeksning 54-moddasi (Epidemiyaga qarshi kurash qoidalarini buzish) bilan ish qo‘zg‘atilgan.

Eslatib o‘tamiz, 27-aprel kuni yuz bergan kuchli shamoldan keyin zarar ko‘rgan Qorako‘l tumani aholisi 28-aprel kuni suv toshqini haqidagi xabarlar sababli o‘z xonadonlarini tark eta boshladi. O‘zbekiston Favqulodda vaziyatlar vazirligi va Buxoro viloyat hokimligi suv toshqini va evakuatsiya haqidagi xabarlarni rad etdi. Voqealar markazida bo‘lgan “Daryo” muxbiri Feruz Muhammad aslida Qorako‘lda nima yuz bergani haqida xabar berdi.