Sardoba suv omborining hozirgi holati va yuzaga kelgan texnogen ofatning sabablarini o‘rganish, uning kelib chiqish holatlari qayta takrorlanishining oldini olish maqsadida Moskva davlat qurilish universiteti mutaxassislari jalb qilingan. Bu haqda 1-mart kuni Qurilish vazirligida o‘tkazilgan matbuot anjumanida so‘z yuritildi, deya xabar bermoqda “Daryo” muxbiri.

Tadbirda qurilish vaziri Botir Zokirov mazkur jarayonga nima uchun aynan rossiyalik mutaxassislar jalb qilinganiga izoh berdi.

Foto: “Daryo”

“Moskva davlat qurilish universiteti mutaxassislarini bu masalaga jalb qilganimizning sababi shuki, ularda katta tajriba bor. Ushbu oliy o‘quv yurti mutaxassislari shunga o‘xshash o‘nga yaqin masalalarni o‘rganib, o‘z xulosalarini berishgan. Shuning uchun ham biz MDQU vakillarini taklif qildik. Ular xolis tashkilot, hech kimga bo‘ysunmaydi. Universitet shartnomani vazirligimiz bilan tuzgan.

Rossiyalik mutaxassislar birinchi bosqichda Sardoba talafoti sabablarini aniqlasa, ikkinchi bosqichda mavjud muammolarni bartaraf qilish bo‘yicha loyiha takliflarini tayyorlab beradi.

Shuni alohida qayd etish kerakki, Moskva davlat qurilish universiteti mutaxassislari o‘rganish ishlarini yakunlaganidan so‘ng, ularning xulosalarini ham tekshirish uchun Italiya, Turkiya, Koreya singari beshta davlatdan mutaxassislar jalb qilinadi. Biz ular bilan muzokaralar olib borganmiz. Ular Sardoba bo‘yicha talafot oqibatlaridan tashqari, loyihaviy yechimlariga ham xulosa taqdim qilishadi. Ular umumiy xulosalarni beradi. Suv omborni qayta tiklash ishlari hech qachon bitta tashkilot xulosasi bilan amalga oshirilmaydi”, — dedi qurilish vaziri.