Олий Мажлис Қонунчилик палатасида «Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида»ги қонун янги таҳрирда кўриб чиқилмоқда, деб хабар беради депутат Расул Кушербаев.
Таъкидланишича, 2020 йилнинг 27 апрель куни Бухоронинг Олот, Қоракўл, Жондор туманларида кузатилган табиий офат ҳамда 1 май куни Сардоба сув омборида юзага келган техноген оқибатларини бартараф этишда фавқулодда вазиятларнинг олдини олиш ва бунда ҳаракат қилиш давлат тизими фаолиятини мувофиқлаштириш, оқибатларини бартараф этишни ташкил этишда камчиликлар кузатилган.
«Бу аҳоли ва ҳудудларни фавқулодда вазиятлардан муҳофаза қилиш соҳасида, шу жумладан, фавқулодда вазиятларни бартараф этишда ҳамкорлик қилишнинг ҳуқуқий асосларини такомиллаштиришни тақозо этмоқда… Лойиҳа депутатлар томонидан биринчи ўқишда қабул қилинди», — деб ёзади депутат.
Эслатиб ўтамиз, 2020 йилнинг 27 апрелида Ўзбекистонга Туркманистон ҳудудидан кириб келган кучли шамол оқибатида Бухорода бир киши ҳалок бўлган, 41 киши жароҳатланган эди. Кучли шамолдан сўнг Бухоро, Навоий, Сирдарё ва Самарқанддаги салкам 140 минг хонадон газсиз қолган. Бухоро кучли шамолдан сўнг электр таъминотида энг катта талафот кўрганди.
Президент Шавкат Мирзиёев Бухорода юз берган кучли шамол оқибатларини кўздан кечириш учун вилоятга ташриф буюрган ҳамда Олот ва Қоракўлда табиий офат оқибатларини кўздан кечирганди.
Бухорода 27 апрель шамолидан сўнг Қоракўл ва Олот туманлари билан алоқа узилиб қолганидан кейин Қоракўл ва Олотда тошқин ҳақида асоссиз миш-миш тарқалган ва туман аҳолиси 28 апрель куни ўз хонадонларини тарк эта бошлади. Ижтимоий тармоқларда трактор тиркамасида Бухоро шаҳри томон кетаётган қоракўлликлар видеоси ҳам пайдо бўлган. Кейинроқ сув тошқини ҳақида ёлғон хабар тарқатган шахслар аниқланган эди. Бухоро вилоятида кучли шамол етказган жами зарар 141,6 млрд сўмни ташкил этганди.
Мавзуга доир: Фото: Бухоронинг Олот тумани — 27 апрель шамолидан кейин
Сардоба сув омборининг ҳозирги ҳолати ва юзага келган техноген офатнинг сабабларини ўрганиш учун Москва давлат қурилиш университети мутахассислари жалб қилинганди. Қурилиш вазири Ботир Зокиров 1 март куни Москвадан келган ушбу мутахассисларга 124 минг доллар тўланиши белгиланганини айтганди. 2021 йилнинг майида «Сардоба иши»да айбдор деб топилган 17 кишига суд ҳукми ўқилган.
Мавзуга доир: Фото: Сардоба тошқини оқибатлари
Изоҳ (0)