AQSh “Viloyati Xuroson” (IShIDning Afg‘onistondagi bo‘linmasi)ga aloqador to‘rt nafar afg‘onga nisbatan sanksiyalar kiritdi. Tegishli bayonot AQSh Davlat departamenti saytida e’lon qilingan.
Sanksiyalar ro‘yxatining boshida Sanaulloh G‘afariy turibdi. AQSh hukumati ma’lumotlariga ko‘ra, u 2020-yilning iyun oyidan buyon “Viloyati Xuroson” yetakchisi hisoblanadi. “G‘afariy ‘Viloyati Xuroson’ning Afg‘onistondagi barcha operatsiyalarini ma’qullash va ularni moliyalashtirish uchun javobgardir”, — deyiladi Davlat departamenti bayonotida.
Ro‘yxatda, shuningdek, Kobul viloyatidagi terrorchilik amaliyotlari rahbari mulla Rajab Salohudin ham bor. Amerika rasmiylarining fikricha, Afg‘oniston poytaxtida “Viloyati Xuroson” jangarilarining hujumlarini rejalashtirish va yo‘naltirish mas’uliyati aynan uning zimmasida.
Bundan tashqari, guruhning yuqori martabali qo‘mondoni Sulton Aziz A’zam va “Viloyati Xuroson” uchun xalqaro moliyaviy operatsiyalar tashkilotchisi Ismatulloh Xalozayga nisbatan ham sanksiyalar joriy etilgan.
Yangi cheklovlar shuni anglatadiki, Amerika fuqarolariga qora ro‘yxatga kiritilgan shaxslar bilan har qanday biznes qilish taqiqlanadi. Sanksiyalar ostidagi kishilarning AQSh yurisdiksiyasiga tegishli mol-mulki bloklanadi.
Eslatib o‘tamiz, “Tolibon” 2021-yilning avgust oyida Afg‘onistonning oldingi hukumatini ag‘darishidan oldin “Viloyati Xuroson” kichik guruh bo‘lgan hamda vaqti-vaqti bilan shia hazoralariga qarshi hujumlar uyushtirgan. Oldingi hukumat tomonidan xorijiy qo‘shinlar ko‘magida yaratilgan xavfsizlik tizimi barbod bo‘lgach, “Viloyati Xuroson” keskin kuchaydi va terrorchi tashkilot safidagi jangarilar soni sezilarli darajada oshdi.
Avgust oyidan beri guruh mamlakat bo‘ylab o‘nlab turli hujumlar uyushtirib, yuzlab tinch aholi va “Tolibon” jangarilarini o‘ldirgan. Hujumlarda “Tolibon” patrullari, sunniy va shia masjidlari hamda Kobuldagi eng yirik shifoxona nishonga olingan.
17-noyabr kuni BMTning Afg‘oniston bo‘yicha maxsus vakili Debora Layons “Viloyati Xuroson” hozir kuchayib borayotgani va mamlakatning deyarli barcha 34 viloyatida mavjud ekanini aytdi. “Bu esa xalqaro miqiyosda e’tibor qaratishga loyiq”, — dedi Layon va guruhning hujumlari 2020-yilda 60 ta bo‘gan bo‘lsa, 2021-yilda 334 taga yetganini qo‘shimcha qildi.
Mavzuga doir:
- “Tolibon”dan ham radikalroq “Viloyati Xuroson”: IShIDning Afg‘onistondagi bo‘linmasi kimlar, nima uchun ularni hatto “Tolibon” ham qoralamoqda?
- Afg‘onistondagi IShID va “Al-Qoida” boshqa davlatlarga qarshi hujumlar boshlashi mumkin — Pentagon
- Afg‘oniston armiyasining sobiq askarlari IShID safiga qo‘shilayotgani ma’lum qilindi
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)