Efiopiya bosh vaziri Abiy Ahmed “Tigray ozodligi xalq fronti” isyonchilariga qarshi kurashda qo‘shinlarni boshqarishni o‘z zimmasiga oladi. Bu haqda Fana radioeshittirish korporatsiyasiga tayanib, “RIA Novosti” xabar berdi.
“Biz mamlakatni boshqarish qurbonlik talab qiladigan vaqtda yashayapmiz. Men frontda Milliy mudofaa kuchlarini boshqarishni zimmamga olaman”, — deydi u.
Hukumat rahbari davlat unga yangi mustamlakachilikni yuklashga urinayotgan barcha dushmanlari ustidan g‘alaba qozonishiga ishonch bildirgan.
Abiy Ahmed hokimiyatga 2018-yilda kelgan. Oradan bir yil o‘tgach, u Eritreya bilan mojaroni tugatishga qaratgan sa’y-harakatlari uchun tinchlik bo‘yicha Nobel mukofotini qo‘lga kiritgan.
Avvalroq Efiopiyada olti oylik muddatga favqulodda holat e’lon qilingani to‘g‘risida xabar berilgandi.
Efiopiya hukumati va Tigray mintaqasidagi hukmron “Tigray ozodligi xalq fronti” partiyasi (TPLF) o‘rtasidagi qurolli mojaro 2020-yilning 4-noyabrda yuzaga kelgan. Bunga Efiopiya hukumatining TPLF mamlakat qurolli kuchlarining harbiy bazasiga hujum uyushtirganlik haqidagi ayblovi sabab bo‘lgandi.
Izoh (0)