Belarus muxolifati yetakchisi Tixanovskaya Merkelning Lukashenko bilan muloqotini tanqid qildi

Belarus prezidentligiga sobiq nomzod, muxolifat yetakchisi Svetlana Tixanovskaya Germaniya kansleri vazifasini bajaruvchi Angela Merkelni Belarus prezidenti Aleksandr Lukashenko bilan telefon suhbati o‘tkazgani uchun tanqid qildi. Bu haqda Deutsche Welle xabar berdi.

Nashrning yozishicha, o‘tgan hafta Lukashenko va Merkel ikki marta telefon orqali gaplashib, Polsha bilan chegaradagi inqirozni muhokama qilgan va aloqalarni davom ettirishga kelishib olgan, biroq Tixanovskaya bu o‘zaro hamkorlik u uchun tushunarsiz ekanini bildirgan.

“Belarus xalqiga bu juda g‘alati tuyuldi”, — dedi Tixanovskaya Venada o‘tkazilgan Belarus fuqarolik jamiyati konferensiyasidagi ishtirokidan so‘ng.

Tixanovskaya Merkel nima sababdan Lukashenko bilan aloqaga chiqqanini (chegaralardagi vaziyatni yumshatish uchun) tushunishini tan olsa-da, u Yevropa Ittifoqi yetakchilari Lukashenko bilan “har qanday aloqadan o‘zini tiyishi” kerakligini ta’kidladi.

Shundan so‘ng Merkel Tixanovskaya bilan telefon orqali muloqot qilgan, suhbat davomida u Belarusdagi siyosiy inqiroz davrida demokratik jarayonlarni qo‘llab-quvvatlashini yana bir bor bildirgan.

“Kansler federal hukumat Belarus demokratik harakatini qo‘llab-quvvatlashda davom etishini ta’kidladi”, — dedi hukumat matbuot kotibi Shteffen Zaybert.

Uning so‘zlariga ko‘ra, Merkel Lukashenko hukumatining “halol va erkin saylovlar yo‘li bilan inqirozni hal qilish uchun muxolifat va mustaqil jurnalistlarga qarshi repressiyalarni to‘xtatishi, mahkumlarni ozod qilishi va jamiyat bilan jiddiy muloqotga kirishishi” zarurligini ta’kidlagan.

Lukashenko Germaniya kansleri Angela Merkel bilan telefon suhbati chog‘ida qochqinlarning katta qismini o‘z vataniga qaytarishga ko‘maklashishga va’da bergan. Biroq buning uchun Yevropa Ittifoqi Polsha bilan chegara yaqinidagi lagerda bo‘lib turgan 2000 kishi uchun gumanitar yo‘lak ochishi kerakligini aytgan. Angela Merkel go‘yoki Germaniya uchun bunday yo‘lak ochish bo‘yicha Yevropa Ittifoqi rasmiylari bilan muzokara olib borishga va’da bergan.