Turkiya jinoyatchilikka qarshi kurashda Xalqaro jinoiy politsiya tashkiloti (Interpol) a’zolarining yordamiga tayanadi. Bu haqda Turkiya prezidenti Rajab Toyib Erdo‘g‘on Interpolning 89-bosh assambleyasi ishtirokchilariga yo‘llagan videomurojaatida aytib o‘tdi.
“Jinoyatga qarshi kurashda, ayniqsa, FETO (Fathullachilik tashkiloti) va KIP (Kurdiston ishchilar partiyasi) terrorchilarini ekstraditsiya qilish masalasida Interpol a’zolaridan faol yordam kutamiz. Demokratik asoslarga tajovuz qilayotgan va tinch aholining hayotiga zomin bo‘layotgan terrorchilar ko‘chalarda bemalol yurmasligi kerak”, — dedi Erdo‘g‘on.
Turkiya rahbari, shuningdek, “qator G‘arb davlatlari va xalqaro tashkilotlarning Interpol faoliyatiga ta’sir o‘tkazishga urinishlarini” nomaqbul deb atadi. “Interpol hech qanday shartlarsiz terrorchilarga qarshi kurashni qo‘llab-quvvatlashi hamda u yoki bu davlatning pozitsiyasini e’tiborga olmasligi juda muhim”, — dedi Turkiya prezidenti.
Interpolning 89-bosh assambleyasi 23—25-noyabr kunlari Istanbulda bo‘lib o‘tmoqda. Uning doirasida tashkilotning yangi prezidenti uchun saylovlar bo‘lishi kutilmoqda.
Mavzuga doir:
- Interpol italiyalik narkobaronning qamoqdan qochishiga yordam bergan rossiyaliklarni qo‘lga oldi
- Xitoyda Interpolning sobiq rahbari pora olishda ayblanib, 13,5 yilga ozodlikdan mahrum qilindi
- Interpol saudiyalik jurnalist Jamol Qoshiqchining o‘ldirilishiga aloqadorlikda gumon qilinayotgan 20 kishini qidiruvga berdi
Izoh (0)