Qozog‘iston birinchi prezidenti Nursulton Nazarboyev Nur Otan partiyasi rahbarligini topshirishga qaror qildi. Bu haqda elboshining maslahatchisi va matbuot kotibi Aydos Ukibayga tayanib, Tengrinews xabar berdi.
“Siyosiy kengashning kengaytirilgan yig‘ilishida Nursulton Nazarboyev Nur Otan partiyasi raisi vakolatlarini topshirishga qaror qilib, partiyani mamlakat prezidenti boshqarishi kerakligini ta’kidladi. Vakolatlarni topshirish tartibi partiya ustaviga muvofiq amalga oshiriladi”, — deb yozdi Aydos Ukibay Twitter’da.
Shuningdek, Aydos Ukibay Nursulton Nazarboyevning partiya rahbarligidan ketish haqidagi qarorini izohlagan.
“Tushunish kerakki, Nursulton Abishevich egallab turgan lavozimi va hokimiyatdagi mansabidan qat’i nazar, xalqimiz yetakchisi – elboshi, zamonamizning atoqli siyosatchisi, jahon hamjamiyati tomonidan tan olingan nufuzli shaxs bo‘lib qoladi.
O‘ylaymanki, zamonaviy Qozog‘istonning barpo etilishi zamirida turgan, o‘z vatani uchun jonini ayamaydigan, unga butun umrini bag‘ishlagan inson doimo el-yurt manfaati, millat, butun yurt kelajagi uchun ildiz otib yashashini hamma tushunadi. Elboshining bu aqidasi o‘zgarishsiz qolmoqda”, — dedi Aydos Ukibay Tengrinews’ga.
Uning qayd etishicha, Nazarboyevning bugungi qarori hokimiyatni topshirishning mantiqiy davomi, xolos.
“Nursulton Nazarboyev ta’kidlaganidek, Nur Otan partiyasi, ayniqsa, pandemiya tufayli yuzaga kelgan global inqiroz sharoitida Qozog‘iston prezidentining asosiy tayanchi bo‘lishi lozim. Partiya ustaviga muvofiq, uning raisini saylash va lavozimidan ozod etish Nur Otan partiyasi syezdining mutlaq vakolatiga kiradi. O‘sha paytgacha Nursulton Nazarboyev partiya raisi bo‘lib qoladi”, — deya qo‘shimcha qildi elboshining maslahatchisi.
Avvalroq Nursulton Nazarboyev umurtqasini operatsiya qildirgani Qozog‘iston prezidenti lavozimidan ketishining sabablaridan biri ekanini tan olgandi.
Mavzuga doir:
Izoh (0)