АҚШ ИШИДнинг Афғонистондаги бўлинмасига алоқадор афғонларга қарши санкциялар эълон қилди

АҚШ «Вилояти Хуросон» (ИШИДнинг Афғонистондаги бўлинмаси)га алоқадор тўрт нафар афғонга нисбатан санкциялар киритди. Тегишли баёнот АҚШ Давлат департаменти сайтида эълон қилинган.

Санкциялар рўйхатининг бошида Санауллоҳ Ғафарий турибди. АҚШ ҳукумати маълумотларига кўра, у 2020 йилнинг июнь ойидан буён «Вилояти Хуросон» етакчиси ҳисобланади. «Ғафарий ‘Вилояти Хуросон’нинг Афғонистондаги барча операцияларини маъқуллаш ва уларни молиялаштириш учун жавобгардир», — дейилади Давлат департаменти баёнотида.

Рўйхатда, шунингдек, Кобул вилоятидаги террорчилик амалиётлари раҳбари мулла Ражаб Салоҳудин ҳам бор. Америка расмийларининг фикрича, Афғонистон пойтахтида «Вилояти Хуросон» жангариларининг ҳужумларини режалаштириш ва йўналтириш масъулияти айнан унинг зиммасида.

Бундан ташқари, гуруҳнинг юқори мартабали қўмондони Султон Азиз Аъзам ва «Вилояти Хуросон» учун халқаро молиявий операциялар ташкилотчиси Исматуллоҳ Халозайга нисбатан ҳам санкциялар жорий этилган.

Янги чекловлар шуни англатадики, Америка фуқароларига қора рўйхатга киритилган шахслар билан ҳар қандай бизнес қилиш тақиқланади. Санкциялар остидаги кишиларнинг АҚШ юрисдиксиясига тегишли мол-мулки блокланади.

Эслатиб ўтамиз, «Толибон» 2021 йилнинг август ойида Афғонистоннинг олдинги ҳукуматини ағдаришидан олдин «Вилояти Хуросон» кичик гуруҳ бўлган ҳамда вақти-вақти билан шиа ҳазораларига қарши ҳужумлар уюштирган. Олдинги ҳукумат томонидан хорижий қўшинлар кўмагида яратилган хавфсизлик тизими барбод бўлгач, «Вилояти Хуросон» кескин кучайди ва террорчи ташкилот сафидаги жангарилар сони сезиларли даражада ошди.

Август ойидан бери гуруҳ мамлакат бўйлаб ўнлаб турли ҳужумлар уюштириб, юзлаб тинч аҳоли ва «Толибон» жангариларини ўлдирган. Ҳужумларда «Толибон» патруллари, сунний ва шиа масжидлари ҳамда Кобулдаги энг йирик шифохона нишонга олинган.

17 ноябрь куни БМТнинг Афғонистон бўйича махсус вакили Дебора Лаёнс «Вилояти Хуросон» ҳозир кучайиб бораётгани ва мамлакатнинг деярли барча 34 вилоятида мавжуд эканини айтди. «Бу эса халқаро миқиёсда эътибор қаратишга лойиқ», — деди Лаён ва гуруҳнинг ҳужумлари 2020 йилда 60 та бўган бўлса, 2021 йилда 334 тага етганини қўшимча қилди.