Kobuldagi shifoxonada portlash sodir etildi. Hodisa oqibatida kamida 15 kishi halok bo‘lgan (video)

Afg‘oniston poytaxti Kobuldagi Sardor Muhammad Dovud Xon nomli harbiy shifoxonaning kirish qismida noma’lum shaxs o‘zini portlatib yubordi. U bilan birga kamida 15 kishi halok bo‘ldi, deya xabar berdi Reuters.

Agentlikning “Tolibon” xavfsizlik kuchlari vakillariga tayanib yozishicha, hodisa oqibatida 34 kishi jarohat olgan.

Ayrim ommaviy axborot vositalari ikkita portlash yuz bergani haqida xabar bermoqda.

“Xudkush-terrorchilik hujumi Sog‘liqni saqlash vazirligi yonida joylashgan 400 o‘rinli shifoxonada sodir bo‘ldi”, — deya voqea guvohlaridan iqtibos keltirgan “RIA Novosti” agentligi.

Ba’zi nashrlar portlashdan so‘ng darhol otishma ovozlari eshitilganini xabar qildi. Afg‘oniston matbuotiga ko‘ra, hujumlar IShIDning Afg‘onistondagi bo‘limi — “Viloyati Xuroson” terrorchilik tashkiloti jangarilari tomonidan amalga oshirilgan.

Hozircha mamlakatda faoliyat yuritayotgan qurolli guruhlarning hech biri hodisa uchun javobgarlikni o‘z zimmasiga olmadi. Avgust oyida Afg‘onistonda hokimiyatni qo‘lga kiritgan “Tolibon” hali voqea yuzasidan izoh bermagan.

15-oktabr kuni Afg‘onistonning Qandahor shahrida joylashgan shialar masjidida portlash sodir etilgandi. Hodisa qurbonlari soni 62 kishiga yetgan. Guvohlarning aytishicha, teraktni to‘rt nafar xudkush sodir etgan. Ulardan ikki nafari masjidning old tarafidagi darvoza yonida o‘zini portlatgan, yana ikkitasi binoga kirib, ichkarida o‘zini portlatgan.

Undan bir hafta oldin, 8-oktabr kuni mamlakat shimolidagi Qunduz shahrida yana bir shialar masjidida portlash yuz bergan. O‘shanda Frans-Press agentligi manbalarga tayanib, kamida 50 kishi qurbon bo‘lgani va 140 kishi yaralanganini xabar qildi. Aamaj News hodisaga oid videomateriallar, shuningdek, guvohlarning ko‘rsatmalariga tayanib, portlashda 100 ga yaqin odam halok bo‘lgani haqida yozgan.

Mamlakatda davom etayotgan portlashlar fonida “Tolibon” IShID jiddiy xavf tug‘dirmasligini ta’kidlab, IShID a’zolari hibsga olinayotgani va yo‘q qilinayotgani haqida xabar berdi.