Kanada bosh vaziri Jastin Tryudo boshchiligidagi Liberal partiya 20-sentabr kuni mamlakatda bo‘lib o‘tgan navbatdan tashqari parlament saylovlarida g‘alaba qozondi.
Kanada Milliy saylov komissiyasi rasmiy saytida e’lon qilingan ovoz berishning dastlabki natijalariga ko‘ra, saylovchilarning 31,7 foizi hukmron partiyaga ovoz bergan. Shunday qilib, Kanada Liberal partiyasi parlamentdagi 308 o‘rindan 156 tasini egallaydi. Hukumat tuzish uchun kamida 170 ta okrugdagi saylovda g‘alaba qozonish kerak.
Kanadadagi asosiy muxolifatchi siyosiy kuch bo‘lgan Konservativ partiya 34,1 foiz ovoz to‘pladi hamda qonun chiqaruvchi organda 121 ta mandatni qo‘lga kiritdi.
Uchinchi o‘rin Kvebek blokiga nasib qildi, u 32 ta saylov okrugida (8,2 foiz ovoz) g‘olib bo‘ldi. Undan keyingi o‘rinlarni Yangi demokratik partiya (27 ta okrugda g‘alaba, 17,6 foiz ovoz) va Kanadaning yashillar partiyasi (2 ta okrugda g‘alaba, 2,2 foiz ovoz) egalladi.
Kanadada 27 366 297 saylovchilar ro‘yxatga olingan. Dastlabki natijalarga ko‘ra, saylovda ishtirok etganlar 45,65 foizni (12 492 213 kishi) tashkil qilgan. Ovoz berish doirasida butun mamlakat bo‘ylab 20 mingdan ortiq saylov uchastkalari (105 140 ta saylov qutilari) ochildi.
Eslatib o‘tamiz, Jastin Tryudo saylovoldi tashviqotlari chog‘ida namoyishchilar tomonidan toshbo‘ron qilingandi. Voqea bosh vazir po‘lat zavodidagi mitingdan chiqib, avtobus tomonga ketayotgan paytda sodir bo‘lgan. Tryudo CBC telekanaliga bergan intervyusida unga shag‘al tegganini, lekin o‘zini yaxshi his qilayotganini aytgan. CTV News xabariga ko‘ra, Tryudoga shag‘al otganlar orasida aholini majburiy emlashga qarshi konservativ harakat — Kanada Xalq partiyasining tarafdorlari ko‘p bo‘lgan.
Izoh (0)