Turkmaniston prezidenti koma holatiga tushgani haqidagi xabarlar rad etildi

Turkmaniston prezidenti Gurbanguli Berdimuhamedovning ahvoli yomonlashgani haqidagi xabarlar haqiqatga to‘g‘ri kelmaydi, u tadbirlarda ishtirok etmoqda. Bu haqda “RBK”ga Turkmanistonning Rossiyadagi elchixonasi matbuot xizmati ma’lum qildi.

“Bir qator OAVlarning, go‘yoki, Turkmaniston prezidentining ahvoli yomonlashgani haqidagi xabarlari mutlaqo ishonchsiz va haqiqatga to‘g‘ri kelmaydi”, — deyishdi matbuot xizmatida.

Diplomatik missiya qayd etishicha, mamlakat prezidenti tadbirlarda muntazam ishtirok etmoqda, ularning jadvali esa prezident saytiga joylashtirilgan. Xususan, 20-sentabr kuni Berdimuhamedov onlayn-formatda Vazirlar Mahkamasi yig‘ilishini o‘tkazgan, — deyiladi elchixona xabarida.

Avvalroq “RIA Novosti” nomi keltirilmagan OAVlarga tayanib, Berdimuhamedov koma holatida yotganini ma’lum qilgandi.

Shundan keyin bu yangilik boshqa yirik Rossiya OAVlarida tarqalib ketdi. Ulardan hech birida prezidentning komaga tushgani haqidagi mish-mishlarning asl manbasi keltirilmagan.

“Xronika Turkmenistana” ta’kidlashicha, Berdimuhamedov komada yotgani haqidagi ilk mish-mishlar turkmanistonlik muxolifatchi bloger Muxammet Duyejining YouTube kanalida paydo bo‘lgan. Tegishli rolik kanalga 21-sentabr kuni tonggi vaqtda joylangan.

Nashr eslatishicha, so‘nggi marta Turkmaniston rahbari 20-sentabr kuni, Vazirlar mahkamasining mamlakat mustaqilligining 30 yilligini nishonlashga tayyorgarlik ko‘rishga bag‘ishlangan kengaytirilgan yig‘ilishi chog‘ida telekameralar obyektivlari qarshisida ko‘ringan.

Eslatib o‘tamiz, 2019-yil iyulida ba’zi OAVlar va Telegram kanallar anonim manbalarga tayanib, Berdimuhamedovning o‘limi haqida ma’lum qilgan edi. O‘shanda Turkmaniston elchixonasi xabarlarni rad etib, ularni “g‘irt yolg‘on” deb atagan, prezident esa yana omma oldiga chiqishda davom etgan edi. Keyinroq mamlakat siyosiy doiralaridagi manba Berdimuhamedov kasal onasidan xabar olgani Germaniyaga ketgani sababli ommaga ko‘rinish bermayotganini ma’lum qilgandi.

Berdimuhamedov 64 yoshda, u 2007-yil fevralida Turkmaniston prezidentiga aylangan.

Avvalroq Turkmaniston prezidenti Gurbanguli Berdimuhamedov yaqin kunlarda rasmiy tashrif bilan O‘zbekistonga kelishi kutilayotgani xabar berilgan edi.