Канада бош вазири Жастин Трюдо бошчилигидаги Либерал партия 20 сентябрь куни мамлакатда бўлиб ўтган навбатдан ташқари парламент сайловларида ғалаба қозонди.
Канада Миллий сайлов комиссияси расмий сайтида эълон қилинган овоз беришнинг дастлабки натижаларига кўра, сайловчиларнинг 31,7 фоизи ҳукмрон партияга овоз берган. Шундай қилиб, Канада Либерал партияси парламентдаги 308 ўриндан 156 тасини эгаллайди. Ҳукумат тузиш учун камида 170 та округдаги сайловда ғалаба қозониш керак.
Канададаги асосий мухолифатчи сиёсий куч бўлган Консерватив партия 34,1 фоиз овоз тўплади ҳамда қонун чиқарувчи органда 121 та мандатни қўлга киритди.
Учинчи ўрин Квебек блокига насиб қилди, у 32 та сайлов округида (8,2 фоиз овоз) ғолиб бўлди. Ундан кейинги ўринларни Янги демократик партия (27 та округда ғалаба, 17,6 фоиз овоз) ва Канаданинг яшиллар партияси (2 та округда ғалаба, 2,2 фоиз овоз) эгаллади.
Канадада 27 366 297 сайловчилар рўйхатга олинган. Дастлабки натижаларга кўра, сайловда иштирок этганлар 45,65 фоизни (12 492 213 киши) ташкил қилган. Овоз бериш доирасида бутун мамлакат бўйлаб 20 мингдан ортиқ сайлов участкалари (105 140 та сайлов қутилари) очилди.
Эслатиб ўтамиз, Жастин Трюдо сайловолди ташвиқотлари чоғида намойишчилар томонидан тошбўрон қилинганди. Воқеа бош вазир пўлат заводидаги митингдан чиқиб, автобус томонга кетаётган пайтда содир бўлган. Трюдо CBC телеканалига берган интервьюсида унга шағал тегганини, лекин ўзини яхши ҳис қилаётганини айтган. CТV News хабарига кўра, Трюдога шағал отганлар орасида аҳолини мажбурий эмлашга қарши консерватив ҳаракат — Канада Халқ партиясининг тарафдорлари кўп бўлган.
Изоҳ (0)