Germaniya parlamentining eng yirik partiyasi — CDU/CSU (“Germaniya Xristian Demokratik Ittifoqi” va “Bavariya Xristian Sotsial Ittifoqi”) Ukrainani qo‘llab-quvvatlash bayonoti bilan chiqdi. Rossiya tomonidan tahdidlar kuzatilayotgan bir paytda deputatlar Yevropa Ittifoqi davlatlarini birlashishga chaqirdi. Tegishli bayonot fraksiyaning tashqi siyosat bo‘yicha vakili bo‘lgan deputat Yurgen Xardtning saytida e’lon qilindi, deb yozmoqda “Korrespondent.net”.
Partiya a’zolarining qayd etishicha, Ukraina chegaralarida Rossiya qo‘shinlarining kuchaytirilishi ehtimoliy harbiy operatsiyalar haqidagi xavotirlarga sabab bo‘lmoqda.
“Shuning uchun, Germaniya Bundestagining CDU/CSU parlament guruhi Yevroittifoq davlatlari tashqi ishlar vazirlarining Moskvaga nisbatan qat’iyatli va birinchi navbatda, yakdil munosabatni namoyish etishini kutmoqda”, — deyiladi bayonotda.
Shuningdek, deputatlarning ta’kidlashicha, qo‘shnilari NATO mamlakatlari bo‘lgan Qora dengizda Rossiyaning harbiy harakatlari xalqaro hamjamiyatning yaqin hamkorligini talab qiladi.
“Agar Yevropa Ittifoqi tinchlik tartibining ushbu markaziy masalasi bo‘yicha birdamlik bilan harakat qilsa, bu bizning Sharqiy Yevropadagi do‘stlarimiz va qo‘shnilarimizga dalda beradi. Shuningdek, bu transatlantik birlikning belgisi ham hisoblanadi”, — deyiladi bayonotda.
Bayonot mualliflari Ukrainaga qarshi Rossiya agressiyasining qayta boshlanishi Yevropa xavfsizlik tartibining asoslariga ta’sir ko‘rsatishini ham qayd etib o‘tdi.
Ma’lumot uchun, Buyuk Britaniya may oyida Ukraina va NATO bo‘yicha sheriklari bilan birdamlik va ularni qo‘llab-quvvatlash ramzi sifatida mintaqada Rossiya qo‘shinlarining ko‘paytirilishi fonida Qora dengizga ikkita harbiy kema yuborishni rejalashtirmoqda. Bortida Rossiya kemalaridan tahdid bo‘lgan taqdirda, yordamga keluvchi F-35 qiruvchi samolyotlari va Merlin vertolyotlari joylashgan HMS Queen Elizabeth samolyot tashuvchi kemasi ularni kuzatib boradi.
Avvalroq Fransiya prezidenti Emmanuel Makron, Germaniya kansleri Angela Merkel va Ukraina prezidenti Vladimir Zelenskiy Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytgandi.
Shuningdek, Ukraina Shaharlar assotsiatsiyasi raisi va Kiyev meri Vitaliy Klichko Rossiyaning tashqi tajovuz tahdidi sababli ukrainaliklarga va hukumatga murojaat qildi. Siyosatchining so‘zlariga ko‘ra, tashqi tahdid sharoitida ukrainaliklar qo‘rqmasligi, markaziy va mahalliy hukumat birlashishi va siyosatchilar tortishuvlarini bir chetga surib qo‘yishi kerak.
Bungacha ham Bayden va Merkel Rossiyani Ukraina bilan chegaradagi qo‘shinlarini olib ketishga chaqirgan edi. Ungacha Rossiya Ukraina chegarasiga va Qrimga 40 ming nafardan askar jo‘natgani haqida xabar berilgan. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.
Izoh (0)