Rossiya Tashqi ishlar vazirligi Moskvadagi Bolgariya elchixonasining ikki xodimini persona non grata (xush ko‘rilmagan inson) deb e’lon qildi. Bu haqda Meduza xabar berdi.
Xabarga ko‘ra, konsullik xizmatining birinchi kotibi Nikolay Panayotov va savdo-iqtisodiy masalalar bo‘yicha birinchi kotib Chavdar Xristozovga 72 soat ichida Rossiya hududidan chiqib ketish buyurilgan.
“Ushbu chora Bolgariyaning Sofiyadagi Rossiya elchixonasining ikki xodimini mart oyida qabul qilingan persona non grata deb e’lon qilish to‘g‘risidagi asossiz qaroriga javobdir”, — deyiladi Tashqi ishlar vazirligi bayonotida.
Mart oyi oxirida Bolgariya Tashqi ishlar vazirligi rossiyalik ikki nafar diplomatni persona non grata deb e’lon qilgan va ularga mamlakatdan chiqib ketishlari uchun 72 soat vaqt bergan edi.
Avvalroq Bolgariya prokuraturasi ikki nafar rossiyalik diplomatning josuslik faoliyati bilan shug‘ullangani va diplomatik maqomiga to‘g‘ri kelmaydigan ishlarni qilganini ma’lum qilgandi.
Sofiyadagi Rossiya elchixonasi Bolgariya hukumatining navbatdagi asoslanmagan harakati Rossiya—Bolgariya o‘rtasidagi konstruktiv muloqotga xizmat qilmasligini qayd etgan. Elchixona Rossiya mazkur harakatlarga nisbatan javob qaytarish huquqiga ega ekanligini eslatib o‘tgan.
19-mart kuni Bolgariya prokuraturasi mahalliy amaldorlardan iborat guruhning qo‘lga olingani, ular Rossiya manfaatini ko‘zlab, josuslik bilan shug‘ullanganlikda gumonlanayotgani haqida xabar bergan. Hibsga olinganlar orasida rossiyaliklar bo‘lmagan.
2019-yil oktabr oyidan beri Bolgariya jami sakkiz nafar rossiyalik diplomatni ortga qaytargan (22-mart kuni persona non grata bo‘lgan ikki diplomatni ham qo‘shib hisoblagandi). Qaytarilganlarning hammasi josuslik faoliyatini olib borganlikda gumon qilingan.
Izoh (0)