Германия Европа Иттифоқи давлатларини Россия таҳдидига қарши бирлашишга чақирди

Германия парламентининг энг йирик партияси — CDU/CSU («Германия Христиан Демократик Иттифоқи» ва «Бавария Христиан Социал Иттифоқи») Украинани қўллаб-қувватлаш баёноти билан чиқди. Россия томонидан таҳдидлар кузатилаётган бир пайтда депутатлар Европа Иттифоқи давлатларини бирлашишга чақирди. Тегишли баёнот фракциянинг ташқи сиёсат бўйича вакили бўлган депутат Юрген Хардтнинг сайтида эълон қилинди, деб ёзмоқда «Korrespondent.net».

Партия аъзоларининг қайд этишича, Украина чегараларида Россия қўшинларининг кучайтирилиши эҳтимолий ҳарбий операциялар ҳақидаги хавотирларга сабаб бўлмоқда.

«Шунинг учун, Германия Бундестагининг CDU/CSU парламент гуруҳи Евроиттифоқ давлатлари ташқи ишлар вазирларининг Москвага нисбатан қатъиятли ва биринчи навбатда, якдил муносабатни намойиш этишини кутмоқда», — дейилади баёнотда.

Шунингдек, депутатларнинг таъкидлашича, қўшнилари НАТО мамлакатлари бўлган Қора денгизда Россиянинг ҳарбий ҳаракатлари халқаро ҳамжамиятнинг яқин ҳамкорлигини талаб қилади.

«Агар Европа Иттифоқи тинчлик тартибининг ушбу марказий масаласи бўйича бирдамлик билан ҳаракат қилса, бу бизнинг Шарқий Европадаги дўстларимиз ва қўшниларимизга далда беради. Шунингдек, бу трансатлантик бирликнинг белгиси ҳам ҳисобланади», — дейилади баёнотда.

Баёнот муаллифлари Украинага қарши Россия агрессиясининг қайта бошланиши Европа хавфсизлик тартибининг асосларига таъсир кўрсатишини ҳам қайд этиб ўтди.

Маълумот учун, Буюк Британия май ойида Украина ва НАТО бўйича шериклари билан бирдамлик ва уларни қўллаб-қувватлаш рамзи сифатида минтақада Россия қўшинларининг кўпайтирилиши фонида Қора денгизга иккита ҳарбий кема юборишни режалаштирмоқда. Бортида Россия кемаларидан таҳдид бўлган тақдирда, ёрдамга келувчи F-35 қирувчи самолётлари ва Merlin вертолётлари жойлашган HMS Queen Elizabeth самолёт ташувчи кемаси уларни кузатиб боради.

Аввалроқ Франция президенти Эммануэль Макрон, Германия канцлери Ангела Меркель ва Украина президенти Владимир Зеленский Донбассдаги можаронинг авж олишига йўл қўймаслик учун Россия ўз қўшинларини Украина билан чегарадан олиб кетиши кераклигини айтганди.

Шунингдек, Украина Шаҳарлар ассоциацияси раиси ва Киев мэри Виталий Кличко Россиянинг ташқи тажовуз таҳдиди сабабли украиналикларга ва ҳукуматга мурожаат қилди. Сиёсатчининг сўзларига кўра, ташқи таҳдид шароитида украиналиклар қўрқмаслиги, марказий ва маҳаллий ҳукумат бирлашиши ва сиёсатчилар тортишувларини бир четга суриб қўйиши керак.

Бунгача ҳам Байден ва Меркель Россияни Украина билан чегарадаги қўшинларини олиб кетишга чақирган эди. Унгача Россия Украина чегарасига ва Қримга 40 минг нафардан аскар жўнатгани ҳақида хабар берилган. Украина президенти Владимир Зеленский Россияни «жиловлаш»да Байдендан ёрдам сўраган. Кремль эса Россия ва Украина ўртасидаги уруш эҳтимолини истисно қилган.