AQSh prezidenti Jo Bayden va Germaniya kansleri Angela Merkel Rossiya hukumati Ukraina bilan chegaradagi harbiy kuchlarini kamaytirishi kerak, degan fikrda. Davlatlar rahbarlari mazkur masalani telefon orqali suhbat chog‘ida muhokama qildi. Bu haqda Germaniya Federativ Respublikasining rasmiy vakili Shteffen Zaybertga tayanib, Meduza xabar berdi.

Zaybertning so‘zlariga ko‘ra, Merkel va Bayden “Rossiya vaziyatning yomonlashuviga yo‘l qo‘ymaslik uchun yaqinda kuchaytirgan qo‘shinlari tarkibini kamaytirishi kerak”, degan xulosaga keldi.

Shuningdek, AQSh, Buyuk Britaniya va Yevropa Ittifoqi mamlakatlarining diplomatlari Rossiyani Ukraina bilan vaziyatni yumshatishga chaqirmoqda.

Ma’lum bo‘lishicha, AQSh davlat kotibi Entoni Blinken Bryusselda Fransiya, Germaniya, Italiya va Buyuk Britaniya tashqi ishlar vazirlari bilan uchrashdi va ular bilan Ukrainaning sharqidagi vaziyatni muhokama qildi.

Diplomatlar Ukrainaning hududiy yaxlitligini qo‘llab-quvvatlashini e’lon qildi va “Rossiyaning, xususan, harbiy qo‘shinni kuchaytirishi orqali olib borayotgan provokatsiyalari oldida Ukrainaning vazminligini yuqori baholadi”, — deyiladi AQSh bayonotida.

“Ular Rossiyaning Ukraina bilan ziddiyatlarni darhol pasaytirishi zarurligini ta’kidladi”, — dedi AQSh davlat departamenti.

14-aprel kuni Rossiya va Ukraina bir vaqtning o‘zida harbiy mashg‘ulotlar o‘tkazgani haqida xabar berildi. Ukraina qo‘shinlari Qrim chegaralari yaqinidagi tank va piyoda askarlarning hujumlarini qaytarish uchun mashq qilgan. Rossiya floti o‘z navbatida Qora dengizda mashg‘ulotlar o‘tkazgan. Reuters Rossiya harbiylari Qora dengizga AQShning ikkita harbiy kemasi kelishidan oldin mashg‘ulotlar o‘tkazganini ta’kidladi.

Avvalroq Rossiya Ukraina chegarasiga va Qrimga 40 ming nafardan askar jo‘natgani ma’lum qilingan edi. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.