Buyuk Britaniya may oyida, Ukraina va NATO bo‘yicha sheriklari bilan birdamlik va ularni qo‘llab-quvvatlash ramzi sifatida, mintaqada Rossiya qo‘shinlarining ko‘paytirilishi fonida Qora dengizga ikkita harbiy kema yuborishni rejalashtirmoqda. Bu haqda The Sunday Times nashri xabar berdi.

Foto: “Tks.ru”

Nashrning ma’lumotlariga ko‘ra, eskadra mina tashuvchisi va fregat (harbiy kema) O‘rta Yer dengizdagi Qirollik Harbiy dengiz kuchlari zarbdor guruhidan ajralib chiqib, Bosfor bo‘g‘ozi orqali Qora dengizga yo‘l oladi. Bortida Rossiya kemalaridan tahdid bo‘lgan taqdirda, yordamga keluvchi F-35 qiruvchi samolyotlari va Merlin vertolyotlari joylashgan HMS Queen Elizabeth samolyot tashuvchi kemasi ularni kuzatib boradi.

Avvalroq AQSh ham o‘zining harbiy kemalarini Qora dengizga yuborish masalasini ko‘rib chiqdi, lekin mintaqada qo‘shimcha bosimni yuzaga keltirmaslik uchun bu fikrdan qaytdi.

“Mamlakatlar siyosati” Telegram-kanalida yozilishicha, bu Jo Bayden va Vladimir Putin o‘rtasida 13-aprel kuni bo‘lib o‘tgan telefon orqali suhbatdan keyin o‘zgarishlar boshlangani hamda urush xavfining asta-sekin uzoqlashayotganidan dalolat beruvchi ilk qadam.

2021-yil mart oyining oxirida rasmiy Kiyev va tan olinmagan Donesk hamda Lugansk Xalq Respublikalari o‘rtasidagi ziddiyat avj oldi. Buning fonida Rossiya o‘zinning Ukraina chegaralaridagi qo‘shinlari sonini ko‘paytira boshladi. Conflict Intelligence Team (CIT) tergov guruhi Ukraina chegaralaridagi Rossiya qo‘shinlarining faol tarzda ko‘paytirilishi 2014–2015-yillardan buyon eng yuqori darajaga chiqqanini aytdi. Kiyev ma’lumotlariga ko‘ra, Moskva Ukraina chegarasiga va Qrimga 40 ming nafardan askarni joylashtirgan.

Avvalroq Fransiya prezidenti Emmanuel Makron, Germaniya kansleri Angela Merkel va Ukraina prezidenti Vladimir Zelenskiy Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerakligini aytgandi.

Bungacha ham Bayden va Merkel Rossiyani Ukraina bilan chegaradagi qo‘shinlarini olib ketishga chaqirgan edi. Ungacha Rossiya Ukraina chegarasiga va Qrimga 40 ming nafardan askar jo‘natgani haqida xabar berilgan. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.