Donbassdagi mojaroning avj olishiga yo‘l qo‘ymaslik uchun Rossiya o‘z qo‘shinlarini Ukraina bilan chegaradan olib ketishi kerak. Bu haqda Ukraina va Fransiya prezidentlari Vladimir Zelenskiy va Emmanuel Makron hamda Germaniya kansleri Angela Merkel uch tomonlama uchrashuv yakunida ma’lum qildi, deb yozadi “Kommersant”.
“Germaniya kansleri, prezident Makron va prezident Zelenskiy Ukraina—Rossiya chegarasidagi, shuningdek, Ukraina sharqidagi xavfsizlik holatini muhokama qildi. Ular Ukraina bilan chegarada Rossiya qo‘shinlari sonining ko‘payishi hamda noqonuniy anneksiya qilingan Qrim yuzasidan xavotirlarini o‘rtoqlashdi. Davlatlar rahbarlari vaziyat keskinlashuvining oldini olishga erishish uchun ushbu harbiy istehkomlarning qisqarishini talab qildi”, — deyiladi Germaniya hukumati bayonotida.
Fransiya prezidenti Parij Kiyev va Berlin bilan birgalikda mintaqada tinchlik yo‘lida barqarorlikka erishishni niyat qilganini ta’kidladi. “Donbassdagi vaziyatga kelsak, Ukraina va Germaniya bilan biz siyosiy yechimga erishish yo‘lida doimiy safarbar va qat’iyatli bo‘lib qolamiz — bu natijaga erishish mumkin bo‘lgan yagona yo‘l”, — deb yozgan Makron Twitter’da.
Sur la situation au Donbass, avec l'Ukraine et l'Allemagne, nous restons mobilisés et déterminés à faire émerger une solution politique - la seule possible. pic.twitter.com/TFH9Vzk2sb
— Emmanuel Macron (@EmmanuelMacron) April 16, 2021
Muzokaralar yakunlari bo‘yicha bayonotda Vladimir Zelenskiy tez orada “Normandiya formatida” (Germaniya, Fransiya, Ukraina, Rossiya) uchrashuv o‘tkazilishiga umid bildirdi. “Men Normandiya to‘rtligining navbatdagi uchrashuvi yaqinlashayotganiga ishonaman. Fikrimcha, buning iloji bor. 19-aprel kuni Normandiya kvarteti maslahatchilarining yig‘ilishi bo‘lib o‘tadi. Bir qator masalalar muhokama qilinadi”, — dedi Fransiya prezidenti jurnalistlarga.
Eslatib o‘tamiz, 16-aprel kuni Vladimir Zelenskiy Parijga uchib ketdi.Yelisey saroyida Zelenskiy va Makron o‘rtasida “tet-a-tet” (begona kuzatuvchilarsiz yakkama-yakka uchrashuv) muzokaralari bo‘lib o‘tdi. Shundan so‘ng Angela Merkel ularga videokonferensiya formatida qo‘shildi. Uchrashuvning asosiy mavzularidan biri Donbassdagi vaziyatning keskinlashishi bo‘ldi.
Avvalroq Bayden va Merkel Rossiyani Ukraina bilan chegaradagi qo‘shinlarini olib ketishga chaqirgan edi. Ungacha Rossiya Ukraina chegarasiga va Qrimga 40 ming nafardan askar jo‘natgani haqida xabar berilgan. Ukraina prezidenti Vladimir Zelenskiy Rossiyani “jilovlash”da Baydendan yordam so‘ragan. Kreml esa Rossiya va Ukraina o‘rtasidagi urush ehtimolini istisno qilgan.