Qirg‘iziston parlamenti deputatlari koronavirus bilan og‘rigan bemorlarning jung‘or ayiqtovoni (Aconitum soongaricum) zaharli o‘simligi bilan davolanayotgani to‘g‘risida xabar bergan mamlakat sog‘liqni saqlash vaziri Alimqodir Beyshenaliyevning ishdan olinishini talab qilmoqda. Bu haqda “Interfaks” xabar berdi.
Qirg‘iziston parlamenti matbuot xizmati vakilining xabar berishicha, parlamentning ijtimoiy masalalar, ta’lim, fan, madaniyat va sog‘liqni saqlash qo‘mitasi a’zolari hukumatga vazirni lavozimidan chetlatish to‘g‘risida taklif yubormoqchi. 19-aprel kuni bo‘lib o‘tgan qo‘mita yig‘ilishida bir ovozdan shunday qarorga kelingan.
Qirg‘iziston Sog‘liqni saqlash vazirligi rahbari Beyshenaliyev 16-aprel kuni bo‘lib o‘tgan brifing chog‘ida Qirg‘iziston shifokorlari koronavirus bilan kasallanganlarni o‘ta zaharli o‘t — Issiqko‘l ildizi yoki jung‘or ayiqtovoni deb ataluvchi o‘simlik bilan davolayotganini aytgan edi.
“Kasalxonalarda 200 ga yaqin koronavirus bilan kasallangan bemorlar shifokorlar nazorati ostida Issiqko‘l ildizini qabul qilmoqda. Biz giyohni kasallikni yengil shaklda o‘tkazayotgan bemorlarga beryapmiz, ularning hech biri o‘lgani yo‘q”, — deydi Beyshenaliyev.
Uning so‘zlariga ko‘ra, hozirgi vaqtda mamlakatda koronavirusni davolash uchun ishlab chiqilgan ushbu preparatning klinik sinovlari o‘tkazilmoqda. Beyshenaliyev mahsulotni ro‘yxatdan o‘tkazish rejalarini e’lon qildi.
Vazir dorini issiq holda ichish kerakligini ta’kidladi. “Sovuq holda ichgan odam besh daqiqada o‘ladi”, — dedi u. O‘sha kuni Jahon sog‘liqni saqlash tashkiloti (JSST) Qirg‘izistonda foydalanilayotgan Aconitum soongaricum dorisining samaradorligi to‘g‘risida hech qanday ma’lumotga ega emasligi haqida bayonot berdi.
Izoh (0)